Pơma tơ̆ jơ tơƀâp, Đại tướng Phan Văn Giang tơchĕng ‘lơ̆ng dôm tơdrong tơgop đơ̆ng Anih tang măt vang pơm hơtŏk tơdrong pơvei Việt Nam - Nga; atŭm hăm ‘nŏh bơnê tơdrong tơgŭm, vang jang hơdoi kơjăp đơ̆ng Anih tơm jang tơbôl pơma atŭm, Anih tang măt ăn Việt Nam tơ̆ Nga pơma hơdrô̆, lơ̆m noh hơnăp jang đơ̆ng Bơngai tang măt tôch gĭt kăl vă hơmet kơjăp, pơm hơtŏk tơdrong pơvei jang hơdoi găh khul linh 2 pang.

Đại tướng Phan Văn Giang pơma hơdăh, kiơ̆ đơ̆ng tơdrong pơvei jang tơbôl ‘lơ̆ng hơiă đơ̆ng sơ̆, jang hơdoi gĭt kăl tôm tơdrong đơ̆ng 2 teh đak, tơdrong pơvei jang hơdoi găh khul linh Việt Nam - Nga hơnơ̆ng đei tơlĕch jang đei yoa ‘lơ̆ng kiơ̆ jơhngâm đon “lui băl, đei yoa ‘lơ̆ng, tôm tơdrong”, găh rim tơdrong jang gĭt kăl; jang hơdoi chinh trĭ khul linh; jang hơdoi tơ̆ dôm trong jang, khul grŭp lơ pang găh khul linh.