Đại tướng Tô Lâm, Bơngai jang lơ̆m Anih tơm Chĭnh trĭ, Kơdră Anih tơm vei lăng Kŏng an, Phŏ kơdră chĕp kơ̆l Anih pơgơ̆r tơdrong sơđơ̆ng mạng teh đak vang truh, pơma pơtho tơƀôh. Pơma tơ̆ Hop akŏm, Kơdră tơm Tô Lâm athei, Khŭl jang vei lăng sơđơ̆ng mạng teh đak păng dôm bơngai jang lơ̆m khŭl kăl kơ drơ̆ng nơ̆r hlôh vao, tơdrong jang pơgơ̆r kơjăp đơ̆ng Đảng, teh đak găh vei sơđơ̆ng mạng khei ‘năr âu ki; ‘ngoăih kơ tơdrong hơlen lăng tôm tơdrong, pơtôch jang kiơ̆ tơdrong jang yan âu, oei athei jang kiơ̆ dôm tơdrong jang, tơdrong hơgăt, hơnăp jang, trong jang gĭt kăl hlôi đei Anih tơm Chĭnh trĭ, Ban Bí thư lơ̆m dôm tơdrong jang đei ƀơm truh.

Kơdră tơm Tô Lâm lui ngeh akhan, hăm trong bơ̆jang hơdăh, ‘lơ̆ng, Khŭl jang gô 1 jơhngơ̆m đon, drơ̆ng 1 nơ̆r, tơ goăt tơgoăl, đĭ jơhngơ̆m khŏm bơ̆jang kiơ̆ jơnei Tơdrong tơchơ̆t hop akŏm bơngai tang măt lơ̆m teh đak ‘măng mă I (jăl jang 2023 – 2028) hlôi tơlĕch ăn, đei dôm tơdrong vang tơgop ‘lơ̆ng, đei yua lơ̆m tơdrong jang hơtŏk tơiung hrĕnh, kơjăp mŭk drăm, tơpôl kơ teh đak, tơgop vei lăng sơđơ̆ng, đei yua păng pơm tơm teh đak lơ̆m mạng.