Đơ̆ng rŏng kơ mơ̆ng nơ̆r pơma, apinh, găh Công ty jang chĕh phe Thắng Lợi, bơngai dơ̆ng tang ăn khul kơdră pơgơ̆r tơring, dôm anih jang kơpal đei ƀơm truh hlôi tơl tơblang tôch hơdăh hăm rim tơdrong iŏk đei nơ̆r apinh, tơblang hơdăh dôm tơdrong hơgăt đơ̆ng khôi luơ̆t ƀơm truh tơ̆ tĕh, hla ar pơkăp bơ̆ jang păng hơmet ming, tơplih ‘nao dôm công ty choh jang xa, pơtăm ‘long. Mă lei, lơ unh hnam iŏk vei rong ‘long akhan, dôm nơ̆r tơl tơblang âu tam mă tơgăl athei đei tơdrong dăr lăng đơ̆ng Anih dăr lăng kơ Khul kơdră tĕh đak ‘mơ̆i vă sek tơlang dôm tơdrong tơhlăk đơ̆ng kon pơlei hăm công ty.

Pơma pơtôch jơ pơma nuh, ƀok Phạm Ngọc Nghị, Phó Bí thư đảng dêh char, Kơdră vei lăng kon pơlei dêh char chih răk, chă mơ̆ng dôm nơ̆r pơma apinh đơ̆ng công nhân, unh hnam iŏk vei rong ‘long tơ̆ Công ty jang chĕh phe Thắng Lợi pơma tơlĕch, atŭm hăm ‘nŏh ăn tơbăt, hlôi đei hla ar chih athei Anih dăr lăng kơ Khul kơdră tĕh đak bơ̆ jang hơlen năng rim tơdrong tơ̆ Công ty jang chĕh phe Thắng Lợi bơih.