Đơ̆ng năr 15/11 sơnăm sơ̆, Jơnŭm kon pơlei jang mir dêh char hlôi pơtơm tơdrong pơlong kăp gĭt truh dôm jăl jang păng jơnŭm kon pơlei jang mir lơ̆m dêh char. Lơ̆m 1 sơnăm kơ âu, kon pơlei jang mir jơ̆p dêh char hlôi jang đei yua jê̆ 1.100 tơdrong jang.

Ƀơ̆t ‘măng âu, Jơnŭm kon pơlei jang mir dêh char Đak Lăk pôk hơpah hăm 21 jơnŭm jang păng bơngai jang hơgei lơ̆m tơdrong pơm kiơ̆ tơchơ̆t pơlong sơng kơkuh tơbăt 120 sơnăm Năr tơ-iung pơjing dêh char Đak Lăk. Pơjao Hla bar sơkơ̆t “Tơmam drăm choh jang xa hơgei dêh char Đak Lăk sơnăm 2024” ăn 25 tơmam drăm kơ 23 anih jang, bơngai jang lơ̆m dêh char. Pơdah, tơbang hloh 200 tơmam choh pơtăm ‘lơ̆ng, tơmam drăm ‘măn pơm jang kiơ̆ trong jang ‘nao păng choh jang xa hưuh kơ đơ̆ng dôm Jơnŭm kon pơlei jang mir kơ 15 dêh char, pơlei tơm.