Tơpang ti hơrăng hơreo dui đing ƀôm đak đơ̆ng pơgar kaphê hloh 1ha jur truh đak glung Đăk Sôr, ƀok Lê Quang Lâm, oei tơ̆ thôn Quảng Thành, xah Đăk Sôr, apŭng Krông Nô hơlen lăng rim anih pơtoi kơ dôm jăl đing.

Đơ̆ng mir ƀok năm truh tơ̆ đak glung athei pơtoi hloh 10 hơchô̆ đing (rim hơchô̆ kơjung 50m), kơyuơ noh, ƀok athei hơlen mă tơnăp vă đing đei pơtoi ‘lơ̆ng. Khei năr âu, ah đak glung Đăk Sôr anih tơjê̆ pơgar kaphê hnam ƀok Lâm đak hrơ̆ hlang tơmo păng chuơh, pă đei oei đak ruih. Mă lei đơ̆ng hơbong đak ‘măn choh jang xa, ƀok Lâm đei tơdrong hơ-iă hloh, noh dang minh ƀar năr dơ̆ng đei đak đơ̆ng dơnâu mong kơ apŭng Đăk Mil pơchoh truh đak glung Đăk Sôr.

Ƀok Lâm adoi nhen lơ unh hnam nai hlôi pơlăp hơmŏ ƀôm, đing đak, kơchăng ƀôm đak ruih dŏng ‘long pơtăm: “Pơngơ̆t kơ đon đơ̆ng noh sơ̆ truh dang ei oei xa ưh sơđơ̆ng. Đak glung hrơ̆ đơ̆ng năr 6 Têt truh dang ei hloi. Hơpơi ‘meh đei đak vă ruih kaphê hoai kơ răm plei. Sơnăm âu, ƀôh tŏ phang hloh, dôm sơnăm hơdrol noh đak ro hơnơ̆ng noh ưh đei hrơ̆”.

Đak glung Đăk Sôr jing minh lơ̆m dôm đak glung tih hloh tơ̆ apŭng Krông Nô, găn 2 xah Đăk Sôr păng Nam Xuân. Tơ̆ thong đak glung âu đei  3 dơnâu đak vă vei đak ruih ăn ‘long pơtăm ah pơyan phang. Chŏng mă khei năr âu, 3 dơnâu mong đak pơma hơdrô̆ păng đak glung Đăk Sôr pơma atŭm noh đak hlôi hrơ̆, pơhlom 1.300 - 1.500ha ‘long pơtăm kơ kon pơlei jang mir rok kiơ̆ đak glung oei tơjră hăm tŏ pơđang. Lơ pơgar kaphê kơ kon pơlei jang mir lơ̆m tơring kơyuơ ưh kơ mah đak ruih noh đei ƀôh kro sơdrai, lơ kon pơlei jang mir oei xa ưh sơđơ̆ng jơhngơ̆m kơlih đơ̆ng tŏ phang pơđang âu.

Ƀok Nguyễn Văn Đại, Kơdră Anih jang tơ̆ apŭng Krông Nô, kơ Kŏng ti jang gah pơnơ̆ hơbong thong đak Đăk Nông ăn tơbăt, sơnăm âu tŏ pơđang oei deh hloh lơ sơnăm hơdrol ki. Đak tơ̆ 33 dơnâu mong lơ̆m tơring anih jang vei lăng adoi och pơtêng hăm rim sơnăm, tơ̆ minh tơring noh đak hlôi hrơ̆. Kŏng ti hlôi jang atŭm hăm dôm anih jang đei tơrĕk, pơm jang hăm dôm apŭng tơjê̆ nhen Đăk Mil, Đăk Song, đei đak sơđơ̆ng, vă pơchoh ăn apŭng, tơgŭm kon pơlei ruih ăn ‘long pơtăm hoai kơ răm. Mă lei, tơdrong pơro đak hơdrô̆ tơgŭm ăn kon pơlei đei đak ruih ăn ‘long pơtăm truh ah ‘măng ruih mă 4, ah hơtuch khei 4. Oei ah khei 5, mưh tŏ pơđang adoi oei hli hlơt noh kơ rơbâu ha ‘long pơtăm gô ƀơm tŏ phang pơđang: “Pơm kiơ̆ tơdrong pơchoh đak 2 ‘măng truh đak glung Đăk Sôr păng 1 ‘măng pơro noh đơ̆ng 12-15 năr, đak đei pơro đơ̆ng apŭng Đăk Mil păng Đăk Song ro truh apŭng Krông Nô noh đơ̆ng 300.000 - 500.000m3 1 ‘măng. Mă tơm noh gô pơro truh ‘măng mă 4. Ah ‘măng mă 5 lơ̆m khei 5, mưh tŏ phang pơđang kơtang noh ưh đei sơđơ̆ng gah đak ruih ôh”.

Ƀok Doãn Gia Lộc, Kơdră Anih Choh jang xa păng Hơtŏk tơring tơrang apŭng Krông Nô, dêh char Đăk Nông ăn tơbăt, pơyan puih phang âu apŭng đei pơhlom 4.600ha ‘long pơtăm rim sơnăm, atŭm hăm noh apŭng đei jê̆ 30.000ha ‘long kŏng ngĭp. Pơyan phang sơnăm âu đei lăng gô kơtang hloh, kơyuơ noh apŭng hlôi tơlĕch lơ trong jang vă hơtŏk tơdrong tơjră tŏ phang pơđang nhen tơplih hơdrĕch ‘long pơtăm, pơm jang akŏm, pơtho kon pơlei yua đak mong ƀiơ̆, kôih hơmet thong hơbong đak. Mă lei, lăp ‘nao hơtuch khei 2 mă lei hlôi đei ƀôh ưh kơ mah đak ruih noh tơdrong mă pơyan tŏ phang pơdui truh khei 5, khei 6, minh ƀar hơgăt teh ‘long pơtăm tơ̆ tơring nhen Đăk Sôr, Nam Nung, Nam Xuân, Tân Thành gô ƀơm tŏ phang pơđang. Apŭng Krông Nô tŏk bŏk pơm jang hăm dôm anih jang đei tơrĕk vă chă đei đak ruih ăn dôm tơring mă ƀơm tŏ pơđang kơtang.

Ƀok Doãn Gia Lộc ăn tơbăt, apŭng hlôi pơm jang hăm dôm anih jang hnam kơmăi unh hơyuh tơ̆ đak krong Krông Nô nhen: Hnam kơmăi unh hơyuh Buôn Kuốp, Hnam kơmăi unh hơyuh Chư Pông Krông vă kơchăng pơro đak lơ̆m pơyang phang âu, tang găn đei tơdrong ah kon pơlei kăl noh hnam kơmăi unh hơyuh ưh đei pơro đak mă kơplah hnam kơmăi unh hơyuh pơro đak noh kon pơlei ưh kơ băt chă yua: “Nhôn adoi tơroi gah tơdrong, đơ̆ng dang ei truh ah hơtuch pơyan tơdrong kăl đak ruih ăn ‘long pơtăm, mă lei thong hơbong đak roi năr roi hrơ̆ och. Noh apŭng hlôi jang atŭm hăm dôm anih jang nhen Hnam kơmăi unh hơyuh Buôn Kuốp, Kŏng ti jang gah hơbong pơnơ̆ đak Đăk Nông, păng minh ƀar hnam kơmăi unh hơyuh jang tơ̆ tơring, chih akŏm jơ ‘năr pơro đak ruih ăn bah đak krong Krông Nô, lơ̆m noh đei 7 xah tơter đak krong noh tơrĕk kơtă athei asong đak ruih mă trŏ ƀlep”.