‘Năr 14/8/2014, lơ̆m ‘măng năm bơ̆jang tơ̆ pơlei tơm Cần Thơ, Tổng Bí thư Nguyễn Phú Trọng kŭm hăm khŭl bơ̆jang Trung ương hlôi ‘măn jơ năr năm ngôi, bơ̆jang hăm Anih jang Đảng, Anih tơm pơgơ̆r khŭl lĭnh Quân khu 9. Sơkơ̆t hơdăh anih dơ̆ng kơ Quân khu ‘noh jĭ 1 tơring tang găn tôch kơ gĭt kăl, Tổng Bí thư athei lơ̆m tơdrong ‘nao đei ƀôh hrĕnh, mơmat, ưh kơ ê, Quân khu 9 kăl hơnơ̆ng kơchăng băt hơdăh kơtơ̆ng ang, băt hơdăh tơdrong, ưh kơ lê̆ đei ưh kơ ê, vei sơđơ̆ng ling lang iung tơblăh, pơvih pơvăn iung tơblăh lơ̆m dôm tơdrong đei ƀôh hơyơ; vei kơjăp tơring plĕnh, đak dơsĭ, achon đak dơsĭ, tơdrong pơm tơm Teh đak. Jang kiơ̆ athei đơ̆ng Tổng Bí thư Nguyễn Phú Trọng, dôm sơnăm âu ki, kang ƀô̆, khŭl lĭnh Quân khu 9 ling lang hơtŏk ‘lơ̆ng jơhngơ̆m đon tơgoăt tơgoăl; tơlĕch jang hrơ̆ch, đei yua dôm trong jang pơjing Đảng bộ Quân khu pran kơjăp găh chĭnh trĭ, đon tơchĕng, jơhngơ̆m đon ‘lơ̆ng, khŭl jang păng kang ƀô̆.

Oei arih ki, hăm lơ kơchư̆k bơ̆ jang đơ̆ng kơdih, Tổng Bí thư Nguyễn Phú Trọng ling lang ‘măn jơhngâm đon ‘mêm mơnat păng đon pơngơ̆t tôch ai hăm đe kăn ƀô̆, linh đak dơsĭ Kon pơlei Việt Nam pơma atŭm păng ƀô đô̆i Trường Sa pơma adrô̆. Jơ pơma nuh đơ̆ng Tổng Bí thư lơ̆m ‘măng năm bơ̆ jang đơ̆ng ƀok truh ngôi hăm Tơring 4 Khul linh đak dơsĭ lơ̆m ‘năr 5/5/2016, Tổng Bí thư jet gia pơma nuh, apinh truh tơdrong arih xa kơ đe kăn ƀô̆, linh păng kon pơlei tơ̆ apŭng achon kông Trường Sa; pơlung băl mât 1 ƀơ̆r đon, adrin jang tŏk klăih đơ̆ng rim tơdrong pơmat tat vă gơ̆h jang đang ‘lơ̆ng tơdrong jang đei Đảng, Teh đak pơjao. Tổng Bí thư hơnơ̆ng lui kơ đon jang chinh trĭ kơjăp ‘lơ̆ng, đon kơchăng iung tơblăh, chu lôch hŭt hơkâu đơ̆ng kăn ƀô̆, linh đak dơsĭ pơma atŭm păng kăn ƀô̆, linh Tơring 4 pơma hơdrô̆ lơ̆m tơdrong bơ̆ jang vei lăng tơdrong pơm tơm tơ̆ đak dơsĭ, achon kông đak dơsĭ kơ Teh đak.

Thượng tá Nguyễn Văn Khương, Bơngai jang Chinh trĭ tơ̆ achon Song Tử Tây hơnơ̆ng chĕp răk nơ̆r pơma đei ư hơnhang đơ̆ng ƀok Tổng bí thư Nguyễn Phú Trọng. “Grih, bưng ai ‘nŏh sĭt hlŏh, kăp gĭt hlŏh":  “Tổng bí thư Nguyễn Phú Trọng jĭ bơngai tơpăt ‘lơ̆ng, đei đon tơchĕng rơgei, đei trong bơ̆ jang tơnăp mă lei tơdrong mă inh hơiă hlŏh păng ƀlŏk hơnơ̆ng ‘nŏh jĭ nơ̆r pơma đơ̆ng Tổng Bí thư tơ̆ Hop akŏm lơ̆m teh đak dôm anih jang Nội chính mưh tơlĕch jang kiơ̆ tơdrong Tơchơ̆t 13 đơ̆ng Đảng (‘năr 15/9/2021). ‘Nŏh jĭ: "Tơdrong arih lăp 1 vât đĕch, athei  arih thoi yơ vă huei hmach, huei ơh yoa dôm tơdrong kơnê̆, ưh kơ tơpăt ‘lơ̆ng. Jên lơ vă pơm kiơ, lôch kơnh ưh gơ̆h chĕp ba ôh lah. Bưng ai ‘nŏh jĭ tơdrong kăp gĭt hlŏh!”

Lơ̆m ‘măng năm ngôi, bơ̆jang tơ̆ dêh char Kon Tum lơ̆m khei 4/2011, Tổng Bí thư, Kơdră Quốc hội Nguyễn Phú Trọng ‘măn jơ năr năm ngôi tơ̆ pơlei Ba Na tơ̆ plei Đăk Mút, xăh Đăk Mar, apŭng Đăk Hà. Tơ̆ âu Tổng Bí thư chă hơlen lăng găh tơdrong arih sa, răp mơ̆ng nơ̆r tơroi, tơchĕng ‘meh vă păng tơtă kơ kon pơlei hơtŏk jơhngơ̆m đon tơgoăt tơgoăl, pơcheh hơgei lơ̆m jang sa. Ƀlŏk nơ̆r tơtă đơ̆ng Tổng Bí thư, 13 sơnăm âu ki, 148 ŭnh hnam kon pơlei plei Đăk Mút hlôi yak hloh lơ mơmat tat vă hơtŏk tơiung jang sa, tơplih ‘lơ̆ng đei tơdrong arih sa păng pơjing jơnei tơring tơrang ‘nao.

‘Nhŏng A Nguyên, Phŏ Bí thư Đoàn xăh Đăk Mar, pơm hloi bơngai pơgơ̆r pơlei plei Đăk Mút, pơma hơdăh: “Chih răk nơ̆r Mih Trọng tơtă kơdih kâu ĭnh hlôi tơplih đon tơchĕng, trong jang. Hăm rim trong jang ĭnh hlôi pơjing Grŭp jang Hơdruh tơdăm lui khop hơtŏk tơiung mŭk drăm vă đơ̆ng noh hơdruh tơdăm gơh pơm tơ ‘ngla đei kơdih kâu, pơm tơ ‘ngla đei mŭk drăm. Dang ei, Grŭp jang hlôi đei hloh 15 ‘nu bơngai jang akŏm đei hơdruh tơdăm vă hơtŏk tơiung mŭk drăm đang kơ ‘noh vang jang lơ̆m Khŭl, Grŭp”.