Năr 14/7/2016, Ƀok Tổng Bí thư Nguyễn Phú Trọng hlôi năm hơpong xah Bản Bo, apŭng Tam Đường, dêh char Lai Châu. Dôm nơ̆r pơma, hơlêm đơ̆ng Ƀok Tổng Bí thư hlôi jing jơhngơ̆m pran vă kon pơlei, jơnŭm pơgơ̆r tơring Bản Bo hơtŏk pơm jang klaih đơ̆ng hin dơnuh. Hram nơ̆r hơlêm pơtho đơ̆ng ƀok Tổng Bí thư, jơnŭm pơgơ̆r păng kon pơlei kon kông Bản Bo hơdrin găn hloh tơnap tap vă hrei âu, Bản Bo jing “anih tơm” hla che kơ apŭng Tam Đường, tơdrong hơrih kon pơlei roi năr roi hơtŏk.

Anih jang Đảng, jơnŭm pơgơ̆r tơring păng kon pơlei kon kông xah Bản Bo hơnơ̆ng băt hơdah nơ̆r tơtă đơ̆ng Ƀok Tổng Bí thư; noh akŏm hơtŏk mŭk drăm hăm choh jang xa, pơjing tơring tơrang ‘nao, iŏk yua tơdrong pran vă hơtŏk ‘long xa plei, rong kon tơrong, hla che ‘lơ̆ng tơguăt hăm anih jang mŭk drăm vă chă trong tĕch tơlĕch tơmam drăm păng tơplih gah hơtŏk dôm trong jang hơvơn tơmang pơhiơ̆.

- Tơ̆ tơring sơlam teh đak kơ apŭng Tuy Đức, dêh char Dak Nông, kơtơ̆ng ang Tổng Bí thư Nguyễn Phú Trọng hiong, kang ƀô̆, đảng viên păng kon pơlei rim hơdrung ơh tôch bach hmach tôch kơ dêh hăm kơdră chĕp pơgơ̆r đĭ jơhnơr kơ yuơ teh đak, kơ yuơ kon pơlei.

Ƀok Điểu Khanh, hơdrung M’Nông, Kơ iĕng Kơdră chĕp pơgơ̆r Hơnih vei lăng kon pơlei tơring Quảng Trực pơma.“Đơ̆ng tơring sơlam teh đak hơtăih hơtŏ, kơtơ̆ng ang Tổng Bí thư Nguyễn Phú Trọng hiong. Kang ƀô̆, đảng viên păng kon pơlei tơring Quảng Trực ơ̆h tôch bach hmach tôch kơ dêh kơ mĭnh ‘nu kơdră chĕp pơgơ̆r tơnăp kơ yuơ teh đak kơ yuơ kon pơlei, mĭnh ‘nu bơngai ‘lơ̆ng rŏ hơbŏ nhen găh jơhngơ̆m đon kĕch mang. ‘Nou jĭ tơdrong hiong răm tih tên kơ Đảng, kơ Teh đak, kơ kon pơlei, mă kăl lơ̆m khei năr teh đak bơ̆n tŏk bŏk tơlĕch jang kiơ̆ kơtang tơdrong jang tơ iung pơjing Đảng, tang găn sa pơgơ̆m pơjĭp đei tơdrong tơgop tih tên đơ̆ng Tổng Bí thư Nguyễn Phú Trọng. Kang ƀô̆, đảng viên păng kon pơlei rim hơdrung lơ̆m tơring ling alng ƀlŏk hơdơ̆r nơ̆r Tổng Bí thư pơkă, kăl tơgoăt tơgoăl mĭnh nơ̆r ƀơ̆r đon, mĭnh jơhngơ̆m đon, lui kơjăp lơ̆m tơdrong chĕp pơgơ̆r đơ̆ng Đảng, Teh đak, hơnơ̆ng kơrŭn jơhngơ̆m hŏk pơhrăm, hơdrin tơ iung pơjing tơring sơlam teh đak pơdrŏng pran kơtang”.

Adoi nhen dôm hơdrung bơngai nai lơ̆m jơ̆p teh đak, ah kơtơ̆ng Ƀok Tổng Bí thư Nguyễn Phú Trọng lôch hiong, kon pơlei Chăm tơ̆ dêh char Bình Thuận tôch ơh sơ-‘ngon.

Ƀok Lâm Tấn Bình, kan ƀô̆ pơdơh hưu bơngai Chăm tơ̆ xah Phan Hiệp, apŭng Bắc Bình, dêh char Bình Thuận ăn tơbăt, đơ̆ng chă hơlen dôm ƀai đŏk lơ̆m hop akŏm, tơdrong kăp gĭt kơ teh đak, ƀok hmach bơnê hăm dôm tơdrong pơgơ̆r kăp gĭt đơ̆ng Ƀok Tổng Bí thư păng mă kăl noh dôm ƀai đŏk tơrĕk truh tơdrong khop, kon pơlei kon kông; kiơ̆ đơ̆ng noh, tơbang jơhngơ̆m pran tih tên kơ tơdrong tơguăt tơguăl tôm kon pơlei lơ̆m tơdrong jang hơtŏk mŭk drăm – tơpôl kơ teh đak: “Ah kơtơ̆ng Ƀok Tổng Bí thư Nguyễn Phú Trọng lôch hiong, lơ̆m plei nuih kơdih inh păng tôm kon pơlei Chăm tôch ơh sơ-‘ngon. Ƀok Trọng lôch hiong lê̆ ăn tôm kon pơlei Việt Nam tơdrong ‘mêm băt. Kơlih, đĭ jơhnơr hơrih kơ po, Ƀok hlôi akŏm đĭ kơ̆l ‘ngok hơgei, jơhngơ̆m păng đon bơnôh pơm jang ăn teh đak Việt Nam gơh pơdrŏng jơnap păng pran kơtang. Ƀok jing minh kơdră pơgơ̆r nuih mơng gơh hơgei tơ̆ Việt Nam, Ƀok hiong noh lê̆ ăn nơ̆r ‘lơ̆ng hơ-iă păr jơ̆p jang plenh teh nhen kơ hơyuh ƀâu phu tơpăr ƀenh plenh teh”

 - Kơtơ̆ng ang ƀok Tổng Bí thư Nguyễn Phú Trọng lôch hơchăng ‘noh pơm ăn rim răih kon pơlei bu bu jei ơ̆h sơ-‘ngon tôch bach hmach tôch kơ dêh, lơ̆m ou đei khul jŏh atŏ kơdŏ soang lơ̆m teh đak pơma atŭm păng khul joh ayŏ kơdŏ soang Khmer pơma hơdrô̆.

‘Nhŏng Thạch Sroh oei tơ̆ tơring Đôn Châu, apŭng Duyên Hải, dêh char Trà Vinh, jĭ mĭnh ‘nu bơngai mơ̆t lơ̆m Khul Joh ayŏ kơdŏ soang dêh char tơbăt, khul joh ayŏ kơdŏ soang Khmer khei năr ou ki hlôi đei lơ tơdrong tơgop lơ̆m vei răk tơƀăk mong păng atŏk tơ iung tơdrong joh ayŏ kơdo soang joăt joe kơ hơdrĕch hơdung. Găh kơdih kou, khei năr ou kơnh gô hơnơ̆ng plang đĭ jơhngơ̆m kơdih ăn tơdrong joh ayŏ kơdŏ soang. Găh tơdrong hiong răm kơ Tổng Bí thư Nguyễn Phú Trọng, ‘nhŏng Thạch Sroh tơbăt jơhngơ̆m đon ơ̆h sơ-‘ngon:“Tổng Bí Thư Nguyễn Phú Trọng tôch gơ̆h hơgei, ƀok lăng ba kơtang truh tơdrong oei sa joh ayŏ hơdrĕch hơdrung Việt Nam pơma atŭm, mă kăl lăng ba, hơlêm, pơtrŭt kon pơlei rim hơdrung vei răk tơƀăk mong păng atŏk tơ iung tơdrong oei sa jŏh ayŏ kơdŏ soang joăt joe hơdrĕch hơdrung bơ̆n. Dang ei, kơtơ̆ng ang Tổng Bí thư hiong, ba hăm kon pơlei Khmer tôch kơ ơ̆h ol, apĭnh chĕp răk tơƀăk vei, hôn bơnê jơhngơm đon nhap ƀok lăng tông nông gia kon pơlei pơla”.