Hăm kon pơlei kon kông tơ̆ xah Ayun, apŭng Chư Sê, dêh char Gia Lai, Ƀok Tổng Bí thư Nguyễn Phú Trọng ưh hơdrô̆ jing bơngai kơdră dăp đon dăp bơnôh kơyuơ kơ kon pơlei, mă oei jing bơngai pơjao ăn kon pơlei tơdrong hơrih phĭ tơtŏ dơnŏ ‘lơ̆ng. Lơ̆m ‘măng năm pơm jang tơ̆ Gia Lai ah khei 4/2017, Ƀok Tổng Bí thư Nguyễn Phú Trọng hlôi năm hơpong xah Ayun – minh xah tơnap tap hloh tơ̆ apŭng Chư Sê.

Chă tơmơ̆ng tơdrong hơpơi ‘meh đơ̆ng kon pơlei vă đei pơnơ̆ hơbong đak vă ‘măn choh jang xa, Ƀok Tổng Bí thư hlôi pơgơ̆r tơring akŏm jơhngơ̆m dah tenh kuăng man pơnơ̆ đak Plei Keo. Ƀar sơnăm đơ̆ng rŏng, pơnơ̆ đak Plei Keo đei man keh đang hlôi iŏk đak đơ̆ng đak krong Ayun pơchoh ăn na ƀa hơ-‘nhăk tơdrong phĭ tơtŏ ăn kon pơlei. Đei pơnơ̆ đak Plei Keo, kon pơlei xah Ayun hlôi rei pơtăm hloh 300 hectar ƀa na 2 pơyan, sơđơ̆ng tơdrong hơrih. Ƀok Đinh Miơch, oei tơ̆ pơlei Achông, hmach bơnê tôch gĭt tơmam pôk đơ̆ng Ƀok Tổng Bí thư hăm kon pơlei Ayun: “Kon pơlei sô̆ hơ-iă đơ̆ng rŏng kơ Ƀok Tổng Bí thư Nguyễn Phú Trọng pơgơ̆r man ăn kon pơlei đei pơnơ̆ đak noh tơdrong hơrih hơtŏk ƀiơ̆. Nhôn hơdơ̆r ling lang tơdrong tơgŭm đơ̆ng Ƀok hăm kon pơlei Ayun hrei âu păng ning nai kai ning mônh kơnh”.

Hlŏh 10 sơnăm sơ̆, lơ̆m năr 17/3/2014, Tổng Bí thư Nguyễn Phú Trọng hăm Khul bơ̆ jang Trung ương hlôi năm ngôi hăm kon pơlei rim hơdrung tơring Hồng Hạ, apŭng A Lưới, dêh char Thừa Thiên Huế, dăr lăng tơdrong tơ iung pơjing tơring tơrang ‘nao, tơplih ‘long pơtăm kon tơrong, xut xa pơngot rơvĕt tơjur dơnuh.

Pơma dơnuh hăm Khul kơdră chĕp pơgơ̆r păng kon pơlei tơ̆ ou, Tổng Bí thư pơkă Đảng ƀô̆, kon pơlei lơ̆m tơring hơnơ̆ng kiơ̆ yok rok jơ̆ng joăt joe nuih mơng, tơ iung pơjing pơlei pơla roi năr roi pơdrŏng ‘lơ̆ng liĕm, ư̆h kơ lăng ‘mơng pơngot rơvĕt dơnuh hin pơrăm. Ƀok Hồ Viết Lương, Kơdră chĕp pơgơ̆r Hơnih vei lăng kon pơlei tơring Hồng Hạ hơdơ̆r dơ̆ng: Lơ̆m mă noh, pơđĭ khul kơdră tơring, kon pơlei lơ̆m tơring kơtơ̆ng ang Tổng Bí thư năm ngôi bu bu jei chhôk hơ iă ‘nă hal ngăl.“Mih ma duch nă kon pơlei adoi nhen kơdih ba hơdơ̆r dơ̆ng nơ̆r pơma kơ Tổng Bí thư ‘noh Kon pơlei Hồng Hạ kiơ̆ yok rok jơ̆ng joăt joe pơlei pơla nuih mơng, tơgoăt tơgoăl pôm nơ̆r ƀơ̆ đon tơ iung pơjing hơrih sa phĭ tơtŏ dơnŏ ‘lơ̆ng hơnŭk hơnoa. ‘Nĕ lê̆ pơngot rơvĕt dơnuh hin druh kiơ̆ hơnơ̆ng, bơngai bu ‘lơ̆ng ‘noh hơdrin ‘lơ̆ng hloh dơ̆ng. Tổng Bí thư hiong, kon pơlei ơh sơ-‘ngon dêh. Năr brei tơ̆ hnam Gươl kơ yuơ Tổng Bí thư pôk ăn, kon pơlei luh năm hơpuih hơmet pơ ‘lơ̆ng, atŭm dih băl vang ƀlŏk hơdơ̆r kơ Tổng Bí thư păng ling lang ƀlŏk hơdơ̆r hôn bơnê kơ ƀok”.

Kơtơ̆ng Ƀok Tổng Nguyễn Phú Trọng lôch hiong, kon pơlei Khmer tơ̆ tơring Tơmăn Đak krong Cửu Long ƀrơ̆k kơ jơhngơ̆m đon hĕl sơ-‘ngon ƀơ̆t athei tơklah hlŏng hloi hăm ƀok kơdră kơ kon pơlei. Lơ̆m tơdrong tơroi kơ po, ƀok Thạch Sinh, bơngai vang jang lơ̆m Jơnŭm pơgơ̆r hnam chua Lò Gạch xah Lương Hòa, apŭng Châu Thành, dêh char Trà Vinh tơbang nơ̆r hơ-‘nguơ̆u kơ Ƀok Tổng Bí thư, jing bơngai hơnơ̆ng tơrĕk truh tơdrong hơrih kon pơlei kon kông pơma hơtŭm păng kon pơlei Khmer pơma hơdrô̆. Hăm kơchư̆k jang Tổng Bí thư, ƀok Nguyễn Phú Trọng đei lơ trong tơchơ̆t jang vă hơtŏk tơdrong hơrih ăn kon pơlei kon kông, pơhơtŏ tơdrong hơrih kơ dôm tơring hăm dih băl. Gơnơm thoi noh mă tơring kon kông hlôi tơplih, hơtŏk lơ hloh pơtêng hăm hơdrol ki. Ƀok Thạch Sinh tơroi: “Ah kơtơ̆ng Ƀok Tổng Bí Thư Nguyễn Phú Trọng lôch hiong, inh noh bơngai hơdrung Khmer, hơrih lơ̆m tơpôl kon pơlei Việt Nam, inh ‘mêm băt kơ ƀok. Lơ̆m 3 jăl jang Tổng Bí thư, inh ƀôh layơ ƀok adoi tơgĭt truh sơnong pơyua ăn kon pơlei kon kông. Đang kơ noh ƀok khŏm mă tơjră xa pơjĭp vă ăn kơ đảng păng kan ƀô̆ gơh hlăng ‘lơ̆ng, inh ‘mêm băt kơ ƀok tôch dêh. Inh hơpơi ‘meh đe kơdră ning nai kơnh adoi đei trong jang nhen ƀok Nguyễn Phú Trọng vă vei lăng pơyua ăn kon pơlei, pơm jang ăn kon pơlei pơdrŏng pran kơtang hloh”.