Hnam mŏ Y Chon, bơngai Gié- Triêng, Kơdră vei lăng Khŭl drŏ kăn xăh Đăk Dục, apŭng Ngọc Hồi oei tơ̆ plei Đăk Răng dang ei hlôi jing hơnih pơdă, tĕch dôm kơ loăi tơmam đơ̆ng choh jang sa - tơmam sa ‘lơ̆ng kơ tơring nhen: 'nhĕm nhŭng chhu tơ̆ hơdra, tơ drô ge, ƀoh veh.... ‘Nâu kŭm jing jơhngơ̆m jang 4 sơnăm pơjing Hơp tak xăh Dục Nông đơ̆ng mŏ Y Chon. 4 sơnăm pơjing hơp tak xăh ‘noh 2 sơnăm tơhlăk kơ jĭ Covid-19, mŏ Y Chon kŭm hăm vă jê̆ 40 ‘nu bơngai jang lơ̆m khŭl pơm đei 10 tơmam hơdrô̆, tĕch tôch kơ lơ tơ̆ anih tĕch mơdro. Iŏk yua sơnăm ‘nâu hlôi iŏk đei 1 ti hlak jên. Mŏ Y Chon tơbăt:

“Đảng viên athei jing bơngai pơm jŭk yŭk trong hơlâu găh đĭ đăng dôm tơdrong jang, dôm hơnăp jang. Nhôn ưh khan lăp tĕch bơ̆n nhŭng pôm, ‘nhĕm nhŭng hơdrih dăh mă nhŭng yŏng dơ̆ng mă nhôn hlôi tơplih ‘nhĕm nhŭng ‘noh jing tơmam ‘nhĕm nhŭng chhu tơ̆ hơdra păng nhôn hlôi rơih tơmam âu vă pơlong tơmam Ocop kơdêh char păng iŏk đei 3 hơnglŏng. Truh dang ei tơmam đơ̆ng nhôn đei anih tĕch mơdro sơng iŏk tôch kơ ‘lơ̆ng mă loi ‘noh jĭ dôm năr Têt ‘noh tơmam đơ̆ng nhôn ưh kơ măh ăn anih tĕch mơdro.”

Tơdrong tơroi kơ mŏ Y Chon pơm Kơdră vei lăng drŏ kăn xăh hai, dơ̆ng chông ba kon pơlei tơ̆ tơring mơmat tat tơchă đei trong năm ‘nao lơ̆m pơm tơlĕch tĕch mơdro hai, jĭ 1 lơ̆m kơhrĕng, rơbâu pơtih gia găh kang ƀô̆, đảng viên tơ̆ Kon Tum pơm jŭk yŭk trong hơlâu, tơklep hăm kon pơlei lơ̆m bơ̆jang kiơ̆ dôm hơnăp jang mă khŭl jang Đảng hlôi pơjao. Kiơ̆ kơ ƀok A Blum, mĭnh ‘nu bơngai tôch pơdrŏng sâm Ngọc Linh oei tơ̆ plei Ngọc La, xăh Măng Ri, apŭng Tu Mơ Rông, đunh kơ âu hloh jĭt sơnăm ‘noh sư păng kon pơlei lơ̆m pơlei, lơ̆m xăh oei dơnuh hin dêh. Gơnang đơ̆ng kang ƀô̆ đơ̆ng xăh truh tơ̆ apŭng hơdrin chĕp ti tơƀôh tơdrong jang, pơtho ƀŭ rim kơnong teh, pơtho trong rey dôm găr sâm, ơng cheh phe, kăt sơdrai hơyơ̆l.... mă dang ei mŭk drăm tơplih rơđăh. Dôm tơdrong jang pơm pơdrŏng hăm cheh phe tơring tơ ngiĕt, tơmam gĭt kơ teh đak  Sâm Ngọc Linh hlôi lang să jơ̆p apŭng Tu Mơ Rông. Ƀok A Blum hrĭ jơhngơ̆m tơroi:

 “Kon pơlei nhôn kiơ̆ Đảng, Teh đak, răp mơ̆ng kang ƀô̆ pơtho trong jang sa pơm tơlĕch, pơtăm sâm, pơtăm ƀa vă đei sŏng sa, tơdrong asih sa đei phĭ tơnŏ, hiôk hian.”

Kiơ̆ kơ ƀok Dương Văn Trang, Bơngai jang lơ̆m Trung ương Đảng, Bí thư Anih jang Đảng dêh char, Kơdră Jơnŭm pơgơ̆r kon pơlei dêh char Kon Tum, dôm sơnăm âu ki lăng găh tơring păng tơring kon kông mơmat tat dêh hloh, hlôi đei dôm jĭt rơbâu ‘nu kang ƀô̆, đảng viên đei ăn jur tơ̆ tơring pơm ‘nhŏng oh, tơklep hăm pơlei pơla vang sŏng sa, vang oei hơdai, vang jang, răp mơ̆ng jơhngơ̆m đon tơchĕng, hơmet pơ ‘lơ̆ng nơ̆r apĭnh păng ‘meh vă đơ̆ng kon pơlei. Lăng găh tơring, vang yak hơdai hăm dôm pơlei, xăh vei lăng hơtŏk tơiung mŭk drăm - tơpôl, hơtŏk ‘lơ̆ng tơdrong arih sa kon pơlei ‘noh jĭ trong jang kơjăp, đei bơ̆jang ‘lơ̆ng kiơ̆ rim jơhnơ̆r kơdră chĕp kơ̆l dêh char Kon Tum. Păng lơ̆m jăl jang 2020- 2025 hơnăp jang âu đei hơtŏk ‘lơ̆ng hăm tơdrong hơgăt pơm tơdrong hơtŏk tơiung kơjăp ăn rim pơlei pơla:

“Đĭ jing kang ƀô̆ đảng viên tơgŭm ŭnh dơnuh hin, ŭnh hnam vă jê̆ dơnuh hin bơngai kon kông ‘noh jĭ năm truh tơ̆ mir, tơ̆ roh, năm truh tơ̆ pơgar păng bơ̆jang kiơ̆ tơdrong kăl “ ‘mi hngach ‘yôm đunh”, “chĕp ti tơƀôh tơdrong jang” tơiung đon hơdrin kơdih yak hloh klăih đơ̆ng dơnuh hin đơ̆ng kon pơlei kon kông. ‘Nâu jĭ 1 lơ̆m hơnăp jang chĭnh trĭ gĭt kăl đơ̆ng rim kang ƀô̆, đảng viên tơ̆ tơring păng hơnih đei lơ kon pơlei kon kông arih sa.”

Đơ̆ng tơdrong 1 jơhngơ̆m đon đơ̆ng Đảng păng Kon pơlei, dêh char Kon Tum hlôi jang đang hrôih tơdrong hơgăt đĭ đăng dôm xăh đei trong gre ô tô năm truh anih kơdrơ̆m; pơtho pơhrăm đei hơ tŏk ‘lơ̆ng; hnam pơgang dôm xăh tă kơ đei ƀak si ngăl. Kơ sô̆ ŭnh hnam dơnuh hin đơ̆ng kơpal kơ 65% khei ‘năr pơjing dơ̆ng dêh char sơnăm 1991, jur oei pă hơla kơ 11% lơ̆m sơnăm 2022. Hơdai hăm ‘noh jĭ pơjing đei khŭl jang chĭnh trĭ pran kơjăp hăm 14 Đảng bộ, 668 khŭl jang Đảng hăm hloh 31.300 đảng viên. Drơ̆ng 1 nơ̆r đơ̆ng trong jang păng tơdrong bơ̆jang yan âu, Đảng bộ dêh char Kon Tum hơnơ̆ng hơmet ‘lơ̆ng jơhngơ̆m đon lui hăm Đảng đơ̆ng kon pơlei dôm hơdrĕch hơdrŭng lơ̆m dêh char. Hơdai hăm ‘noh jĭ đon lui gĭt kăl kŭm tŏk bŏk pơm jing tơdrong ‘lơ̆ng păng tơdrong pơ̆n nuih ăn đĭ đăng đảng bộ, bơ̆jang kiơ̆ dôm trong jang tih, hơtŏk dôm tơdrong pran đơ̆ng dêh char vă hơtŏk tơiung kơjăp ‘lơ̆ng.