Lơ̆m ‘măng năm bơ̆ jang tơ̆ dêh char Sơn La lơ̆m ‘năr 8/01/2014, Tổng Bí thư Nguyễn Phú Trọng păng khul jang năm ngôi păng bơ̆ jang tơ̆ Hnam kơmăy unh điên Sơn La. Hăm kăn ƀô̆, công nhân – dôm bơngai chơt hơiă đei sơng Tổng Bí thư ‘nŏh jĭ tơdrong hơiă tih hlŏh, ưh đei lai yơ hiơt. Jơhngâm đon tơpăt ‘lơ̆ng, chơt rơhău păng dôm nơ̆r tơtă tôch hơiă đơ̆ng Tổng Bí thư hơnơ̆ng đei rim bơngai chih răk păng hŏk pơhrăm. Tổng Bí thư hơpơi ‘mĕh khul kăn ƀô̆, kỹ sư, bơngai juăt jang, công nhân tơ̆ Công ty hơnơ̆ng tưk tơiung đon rơgei, dôm tơdrong jang đei lơ̆m khei ‘năr pơjing, iŏk yoa hnam kơmăy, hơnơ̆ng tơƀôh hơdăh bưng ai, hơnăp jang gĭt kăl đơ̆ng Hnam kơmăy unh điên Sơn La; tơgŭm ming man, iŏk yoa sơđơ̆ng ‘lơ̆ng dôm hnam kơmăy unh điên nai lơ̆m teh đak.

Kơtơ̆ng tơroi kơ ƀok Tổng Bí thư Nguyễn Phú Trọng lôch hơchăng, kang ƀô̆ păng kon pơlei Quảng Ngãi hmach ‘mêm tôch kơ dêh. Ƀok Tổng Bí thư Nguyễn Phú Trọng jĭ bơngai đei jơhngơ̆m đon ‘lơ̆ng kach mang; đĭ chăl hơrih tơgop ăn kơ Đảng, ăn Teh đak păng kon pơlei. Lơ̆m đon tơ chĕng ƀlŏk đơ̆ng kang ƀô̆ păng kon pơlei Quảng Ngãi, ƀok Tổng Bí thư Nguyễn Phú Trọng  jĭ bơngai chĕp kơ̆l gĭt kăl mă lei tôch kơ rơhâu, ưh kơ pơrŏ păng tôch kơ hơiă. Ƀok Phạm Đình Khối, sơ̆ pơm Bí thư Anih jang Đảng dêh char Quảng Ngãi tơbăt: Đei tơƀơ̆p Tổng Bí thư Nguyễn Phú Trọng tôch kơ lơ ‘măng mă lei ‘măng pơm ăn hơiă hloh ‘noh jĭ ƀơ̆t mih Trọng vih tơ̆ Quảng Ngãi vang pơm Lêh et hơtŏk Hơnih ƀlŏk tơbăt kơ Thủ tướng Phạm Văn Đồng.

‘Năr 31/8/2008, Tổng Bí thư Nguyễn Phú Trọng hlôi rơih hao gre treng đơ̆ng Hà Nội năm tơ̆ Quảng Ngãi. Sơng Tổng Bí thư tơ̆ hơnih gre treng dơ̆ng Quảng Ngãi, ƀok Phạm Đình Khối păng lơ bơngai ưh kơ kĕ ôn đei jơhngơ̆m ƀrơ̆k mơnat: “Mĭnh ‘nu bơngai chĕp kơ̆l gĭt găl thoi noh mă hao gre treng đơ̆ng Hà Nội năm tơ̆ âu. Ƀơ̆t pơjao kơvang pơkao ăn kơ Tổng Bí thư păng rôp ti, kuăr Tổng Bí thư ĭnh ƀôh ưh pă hơtăih băl đơ̆ng kơdră chĕp kơ̆l dơ̆ng bơih, mă jing tơdrong ‘mêm đơ̆ng ƀok tơpă. Năm đei 3 năr đĕch mă lei mih năm hơnơ̆ng. Đơ̆ng rŏng ‘noh năm tơ̆ Tây Trà, jur năm ngôi tơ̆ xăh, tơƀơ̆p kon pơlei vă apĭnh jet gia, pơjao tơmam iơ iĕ đĕch ră, mă lei hăm Tổng Bí thư, ‘noh jĭ tơdrong ‘mêm tih hloh.”

Kŭm hăm lơ̆m teh đak, kon pơlei apŭng Mỹ Xuyên, dêh char Sóc Trăng tôch ơh sơ ‘ngon mưh kơtơ̆ng ƀok Tổng Bí thư Nguyễn Phú Trọng lôch. Pơm jơhngâm đon ơh jing tơdrong jang kăch mang, Đảng ƀô̆, khul kơdră pơgơ̆r păng kon pơlei apŭng Mỹ Xuyên mât 1 ƀơ̆r đon, bơ̆ jang hơbĕch hơbal, gơ̆h hơgei, khŏm tơiung pơjing Đảng, pơjing anih jang chinh trĭ rơgŏh ‘lơ̆ng, pran kơjăp, pơjing pơlei pơla roi đunh roi pơdrŏng đei ƀôh, hiôk chơt nhen Tổng Bí thư hơpơi ‘mĕh. 

Ƀok Lương Minh Quyết, sơ̆ pơm Kơdră vei lăng kon pơlei apŭng Mỹ Xuyên, tơroi, đunh kơ âu văjê̆ 10 sơnăm, Tổng Bí thư Nguyễn Phú Trọng năm ngôi, bơ̆ jang hăm xăh Ngọc Tố (1 lơ̆m 3 xăh tơring tơrang ‘nao kơ dêh char Sóc Trăng), mưh đei tơƀâp pơma nuh hăm ƀok Tổng Bí thư sư ‘măn lơ̆m jơhngâm ƀok um rup Tổng Bí thư chơt rơhău, iâm dim, nuih mơng păng tôch gơ̆h hơgei. Ƀok Lương Minh Quyết pơma: "Dang ei mih lôch hơchăng bơih, pơm ăn inh kŭm nhen rim bơngai tôch ơh sơ ‘ngon. Lơ̆m tơdrong ơh sơ ‘ngon âu, inh ‘mĕh bơ̆n pơm ăn tơdrong ơh sơ ‘ngon ‘nŏh jing tơdrong jang kăch mang; rim kăn ƀô̆, đảng viên păng kon pơlei adrin hŏk pơhrăm kiơ̆ jơhngâm đon ‘lơ̆ng đơ̆ng Tổng Bí thư Nguyễn Phú Trọng vang tơgop tơiung pơjing pơlei pơla kơdih, teh đak kơdih roi đunh roi pơdrŏng ‘lơ̆ng rŏ, gơ̆h hơgei păng pran kơjăp”.