Lơ̆m 2 ‘măng năm ngôi, bơ̆jang tơ̆ dêh char Kon Tum lơ̆m sơnăm 2011 păng sơnăm 2017, Tổng Bí thư Nguyễn Phú Trọng tă kơ ‘măn jơ năm ngôi, chă hơlen lăng yan âu tơdrong arih sa, răp mơ̆ng đon tơchĕng, ‘meh vă đơ̆ng kon pơlei kon kông. Arih sa tơpăt, rơhâu, dôm nơ̆r apĭnh jet, pơtho tơtă mơ̆t lơ̆m jơhngơ̆m kon pơlei đơ̆ng Tổng Bí thư oei ling lang đei kon pơlei Kon Tum chih răk.

Ƀok A Bát, oei tơ̆ plei Kon Rờ Bàng 2, xăh Vinh Quang, pơlei tơm Kon Tum, ƀrơ̆k kơ jơhngơ̆m tơroi: “Sơnăm 2017 kon pơlei kơtă tơƀơ̆p Mih Nguyễn Phú Trọng tơ̆ âu, kră pơlei pơjao ăn kơ sư 1 blăh ao joăt joe kơ bơngai kon kông. Mih Tổng Bí thư apĭnh jet kon pơlei, Mih rôp ti rim ‘nu bơngai, tơtă ăn kon pơlei hơdrin jang sa ‘nĕ kơ mơ̆ng nơ̆r bơngai kơnê̆ pơhlŭ pơ hlôm. Mơ̆ng kiơ̆ nơ̆r pơtho tơtă đơ̆ng mih Nguyễn Phú Trọng ‘noh kon pơlei plei Kon Rờ Bàng 1 jơhngơ̆m đon hăm băl, tơgŭm băl dang ei ‘noh plei nhôn hơtŏk tơ iung tơplih lơ bơih. Ƀơ̆t kơtơ̆ng tơroi kơ Mih hiong nhôn tôch kơ sơ ‘ngon, bu bu kŭm sơ ‘ngon, bu bu kŭm ‘meh ‘nhơ̆m”.

Jĭ bơngai đei bưng ai lơ̆m tơpôl bơngai Rađe, lơ ‘măng vang truh hăm dôm tơdrong jŏh ayŏ kơ dŏ xoang tơ̆ Hà Nội, nghê̆ nhân rơgei Ama H’Loan, tơ̆ plei Ako Dhông, phường Tân Lợi, pơlei tơm Buôn Ma Thuột, dêh char Đắk Lắk tơroi, Tổng Bí thư Nguyễn Phú Trọng jĭ kơdră chĕp kơ̆l tôch ‘lơ̆ng, hơnơ̆ng ‘mêm kơ kon pơlei, chă răp mơ̆ng nơ̆r pơma, đon hơpơi ‘mĕh đơ̆ng kon pơlei. Gơnơm dôm trong jang tôch trŏ đơ̆ng Trung ương hăm tơdrong chĕp kơ̆l pơgơ̆r đơ̆ng Tổng Bí thư, tơring groi kông, tơring sơlam, tơring kon kông đei tơplih ‘lơ̆ng, jang tŏk pơdrŏng.

Kră pơlei Ama H’Loan pơma: “Iŏk jơhngâm đon ‘mêm kơ eng ‘nŏh vă bơ̆n yak hlŏh dôm tơdrong pơmat tat jang kiơ̆ trong chĕp kơ̆l pơgơ̆r đơ̆ng Đảng, đơ̆ng Teh đak, lơ̆m noh đei nơ̆r pơma đơ̆ng Tổng Bí thư Nguyễn Phú Trọng. Hơdrô̆ inh oei arih, inh chă tơtă ăn mih ma duch nă, pơtho ăn kon sâu, adrin pơjing Tây Nguyên pơdrŏưng ‘lơ̆ng rŏ, vang tơgop pơjing teh đak bơ̆n roi pơdrŏng, roi ‘lơ̆ng rŏ ƀiơ̆.” 

Mơ̆ng tơroi kơ ƀok Tổng Bí thư Nguyễn Phú Trọng lôch hơchăng, kon pơlei dôm hơdrĕch hơdrŭng tơ̆ xăh Quảng Tâm, apŭng Tuy Đức, dêh char Đắk Nông ‘mêm kơ eng tôch kơ dêh. Ƀlŏk nơ̆r Tổng Bí thư tơtă, pơlung kon pơlei lơ̆m ‘măng năm ngôi tơ̆ Quảng Tâm đơ̆ng 12 sơnăm ki, kon pơlei rim pơlei pơla 1 jơhngơ̆m đon, lui ngeh lơ̆m tơdrong chĕp kơ̆l đơ̆ng Đảng, teh đak, 1 jơhngơ̆m pơjing pơlei pơla roi ‘năr roi pơdrŏng ‘lơ̆ng.

‘Nhŏng Điểu Ngót, bơngai M’Nông, Bí thư Đoàn Hơdruh tơdăm cộng sản Hồ Chí Minh xăh Quảng Tâm, apŭng Tuy Đức, dêh char Đắk Nông, tơroi: “Mơ̆ng tơroi kơ Tổng Bí thư lôch hơchăng, jơhnơr mơlôh lơ̆m xăh tôch kơ ‘mêm hmach kơ 1 ‘nu bơngai chĕp kơ̆l gơh hơgei, tơnăp yua kơ teh đak, yua kơ kon pơlei, sư ling lang ‘măn tơdrong ‘mêm gĭt kăl ăn jơhnơr mơlôh păng tơring hơtăih hơtŏ. Nhôn, khŭl hơdruh tơdăm ling lang chih răk nơ̆r Tổng Bí thư tơtă, athei ling lang hơtŏk jơhngơ̆m đon tơgoăt tơgoăl, lui ngeh lơ̆m tơdrong chĕp kơ̆l đơ̆ng Đảng, Teh đak. Nhôn gô hơdrin hŏk pơhrăm, jang sa, hơtŏk tơiung jang sa, hơdrin pơjing pơlei pơla, teh đak roi ‘năr roi pơdrŏng ‘lơ̆ng rŏ”.