Tơ̆ pơlei Dôr, tơring G’Lăr, apŭng Đak Đoa, hăm đei 256 ŭnh hnam bơngai Bahnar hơrih sa, jơ ‘năr kơ năr Têt pơm tơm kơdih teh đak toch kơ chơt hơ iă ‘nă hal, hăm ƀrông ƀrang, mơliơk mơliak hla kơ chă hơtol. Ƀlep lơ̆m jơ ‘năr au, kon pơlei lơ̆m pơlei oei pơgơ̆r mĭnh ƀar tơdrong đă ƀŏng lŏng tơplŏng kơdau vă sơng kơkuh chơt hơ iă ăn năr lêh. Ƀok Sing, thôn trơng pơlei Dôr, tơring Gơlăr, apŭng Đak Đoa, dêh char Gia Lai tơbăt: “ Jơ ‘năr pơm lêh năr 2/9, ŭnh hnam păng pơđĭ lơ̆ pơlei jei hơtol hla kơ teh đak, pơgơ̆r et sa chơt hơ iă ăn năr Quốc khánh. Păng đơ̆ng rŏng ‘nŏh chơ dih băl năm tơ̆ Cham đă ƀŏng lŏng apŭng Đak Đoa vă lăng apŭng pơgơ̆r pơlong đă ƀŏng lŏng. Pơma atŭm, tơdrong hơrih sa kơ kon pơlei nhôn jei sơđơ̆ng ƀiơ̆ pơtêng hăm sơ̆. Kơna jơ ‘năr lêh têt lơ ŭnh hnam jei ăn kon hơkăn chă ngôi, vă pơjing jơhngơưm đon chơt hiôk,phơk lơ̆m jơhngơ̆m ăn kôn mon kon sau hơdrin hŏk pơhrăm hlŏh dơ̆ng lăp đơ̆ng rŏng năr lêh têt”.

Ƀok Y Sênh, bơngai M’Nông, 83 sơnăm, jing bơngai đei kon pơlei lui yom tơ̆ pơlei R’Bút, xah Quảng Sơn, apŭng Đăk Glong, dêh char Đăk Nông. Ƀơ̆t năr Kuôk khanh, ƀok Y Sênh tơƀlŏk dơ̆ng kơ khei năr nuih mơng iung tơjră sơ̆. Kiơ̆ kơ noh, sơnăm 1961, ƀok Y Sênh pơm du kĭt, truh sơnăm 1964 noh pơm ƀô đô̆i, vang tơblah truh ah sơnăm 1975 pơtơm chôt vih tơ̆ pơlei pơla vang jang tơdrong jang tơ̆ tơring. Kơyươ noh, ƀok băt hơdah kơjă kơ tơdrong rơngei hiôk hian:  “Đơ̆ng rŏng kơ yaih phŏng, rơngei hiôk hian bơih, kon pơlei pơtơm sơđơ̆ng pơm jang. Adoi gơnơm đei đảng, teh đak, jơnŭm pơgơ̆r tơring chă tơgŭm kon pơlei hơtŏk tơdrong hơrih. Kon pơlei tơ̆ pơlei pơla adoi lui hăm trong tơlĕch jang đơ̆ng Đảng, Teh đak, pơ-‘nam pơm jang, dang ei tơdrong hơrih hơtŏk ƀôh hơdah”