Ƀok Y Dhun Hmok, kră pơlei plei Dur 1 oei ƀlŏk hơnơ̆ng jơhngâm đon ‘lơ̆ng đơ̆ng Tổng Bí thư Nguyễn Phú Trọng mưh năm ngôi păng vang akŏm lơ̆m Năr Tơguăt đĭ đăng hơdrĕch hơdrung xăh Dur Kmăl, apŭng Krông Ana, dêh char Đắk Lăk ƀât hơtuch sơnăm 2018.

Ƀok chơt hơiă đei tang măt ăn kon pơlei pôk hơpăh ăn Tổng Bí thư ao tanh kơ bơngai Rađe. Ƀok Y Dhun Hmok ƀlŏk dơ̆ng: “Ƀok pơma: Kon pơlei athei akŏm jơhngâm choh jang xa vă pơm hơtŏk tơdrong arih xa, kon hơ ‘lơ̆p athei năm hŏk pơhrăm ‘nŏh jĭ tơdrong hơpơi ‘mĕh đơ̆ng ƀok. Truh dang ei kon pơlei đei măh mai phe xa, ƀa sŏng, hơbăn ao hrŭk, kon sâu đei hŏk pơhrăm chư, ‘nŏh jĭ tơdrong tôch hơiă. Pơlei pơla ‘nŏh đei tơplih ‘nao ‘lơ̆ng rŏ. Kon pơlei ‘mêm bơnê kơ jơhngâm đon ‘lơ̆ng đơ̆ng ƀok ‘măn ăn mih ma duch nă tơ̆ Dur Kmăl”.

Oei ƀok Hmyet, Bí thư Chi ƀô̆ pơm hloi ƀok Pơgơ̆r plei Têng 2, xăh Tân Sơn, plt Pleiku, dêh char Gia Lai, oei hơnơ̆ng ƀôh ‘mêm kơ bơngai chĕp kơ̆l gơ̆h hơgei, đei jơhngâm đon ‘lơ̆ng: “Sơnăm 2011, ƀok Nguyễn Phú Trọng năm ngôi tơ̆ 2 pơlei bơngai Jarai nhôn tơ̆ xăh Ia Tiêm păng xăh Ayun, apŭng Chư Sê. Kon pơlei nhôn ƀôh ƀok tôch pơngơ̆t păng ‘mêm kơ kon pơlei. Ƀok jĭ bơngai chĕp kơ̆l tơpăt ‘lơ̆ng hlôi chĕp kơ̆l pơgơ̆r Đảng bơ̆n tơjră hăm tơdrong yoch xa pơjĭp iŏk đei lơ tơdrong ‘lơ̆ng. Inh păng kon pơlei Jarai tôch lui, gơnơm đei Đảng mă mŭk drăm tơpôl, tơdrong arih xa kơ kon pơlei Tây Nguyên nhôn gơ̆h tơplih ‘lơ̆ng ƀiơ̆”. 

Tơƀôh jơhngâm đon ơh sơ ‘ngon, ‘mêm kơ eng kơ Tổng Bí thư Nguyễn Phú Trọng, ƀok Bon Yô Soan, bơngai đei grih tih tơ̆ plt Đà Lạt, dêh char Lâm Đồng, hơnơ̆ng lui kiơ̆ tơdrong chĕp kơ̆l pơgơ̆r, tơiung pơjing teh đak đơ̆ng Đảng: “Tơdrong tơjră tang găn xa pơjĭp, tơdrong glăi hăm kăn ƀô̆ đảng viên đei ƀok Nguyễn Phú Trọng bơ̆ jang tơpăt ‘lơ̆ng, ưh đei tơring kâm. Dang ei, kon pơlei kon kông tơ̆ dêh char Lâm Đồng hơnơ̆ng mơ̆ng păng lui kiơ̆ tơdrong chĕp kơ̆l đơ̆ng Đảng.”