Xăh sơlam Ia Nan, apŭng Đức Cơ, dêh char Gia Lai, đei hlŏh 8000 ‘nu bơngai, mă lơ ‘nŏh jĭ kon pơlei kon kông arih xa. Hăm tơring xă, kon pơlei kơtuei, lơ bơngai oei pơm ăn kơ dih phao kip vă chă hơngoang sem bri. Trung tá Đỗ Giang Nam – Yŏng Công an xăh Ia Nan, apŭng Đức Cơ tơroi: “Tơring Ia Nan đei 3 pơlei kon kông, đei lơ mih ma duch nă chŏh jang xa mir roh ngăl. Đei nơ̆r tơroi 1 kơ sô̆ bơngai ôn phao, tơmam đôh tơ̆ mir ưh đei chĕp brŏk tơ̆ hnam. Khul linh Công an xăh jang hơdoi hăm Ƀô đô̆i vei lăng tơring sơlam, khul linh tơ̆ tơring roi tơbăt, krao hơvơn đe tơdăm tơ̆ pơlei đa chĕp phao pơm kơdih năm chă hơngoang năm nôp phao.”

Đe kăn ƀô̆ công an oei jang hơdoi hăm kră pơlei, bơngai đei bưng ai tih đei kon pơlei lui yom vă krao hơvơn dôm bơngai juăt yoa phao đơ̆ng kơdih pơm, tơmam đô̆h năm nôp ăn khul jang kơpal. Nhen thoi ƀok Rơ Châm Míu, bơngai đei bưng ai tih đei kon pơlei lui yom tơ̆ plei Nú, xăh Ia Nan hơnơ̆ng chă roi tơƀôh lơ̆m dôm ‘măng hŏk hôp kon pơlei vă kon pơlei pơm kiơ̆ khôi luơ̆t, arih xa hơdai ‘lơ̆ng hơiă, ling lang ‘mêm băt băl, tơgŭm băl lơ̆m tơdrong choh jang xa, ưh đei chĕp vei ôn phao đơ̆ng kơdih pơm: “Iŏk yoa phao kip brei drâu inh hơnơ̆ng roi tơƀôh ăn lơ bơngai, athei nôp ăn xăh, yoa mưh et tơdrô xoai, blĕk jơhngâm ‘nŏh iŏk phao hơvĕng kơna khul linh công an hăm ƀô đô̆i vei lăng tơring sơlam hơnơ̆ng roi tơƀôh vă kon pơlei hŭt lê̆, ưh đei iŏk yoa phao kơlih yoa mưh iŏk yoa phao sư pơm pơrăm truh kơdih kâu păng unh hnam” 

Thiếu tá Nguyễn Thành Duy – Phŏ ƀok yŏng Công an xăh Ia Dom, apŭng Đức Cơ tơroi, kŭm hăm hơtŏk tơdrong roi tơbăt, krao hơvơn, dôm khul linh tơ̆ tơring sơlam athei băt hơdăh rim tơdrong tơ̆ tơring hai, hơtŏk hơnăp jang đơ̆ng đơ̆ng kon pơlei lơ̆m tơdrong vei lăng sơđơ̆ng lơ̆m tơpôl: “Công an xăh kŭm hăm dôm anih jang kơpal vang krao hơvơn, roi tơbăt ăn kon pơlei tơ̆ pơlei pơla pơjao tơmam, phao kơtoang, tơmam đôh. Đei 1,2 tơdrong pơmat tat ‘nŏh 1 kơsô̆ tơdăm đa chă răt tơmam đơ̆ng đe tĕch lơ̆m mang tơpôl vă rap phao pơm kơdih. Công an xăh iok pơdreu đei 2 tŏ tơmam vă pơm păng pơjao ăn Công an apŭng sek tơlang kiơ̆ tơdrong hơgăt.”

Đơ̆ng blŭng sơnăm truh dang ei, mih ma duch nă pơjao ăn Công an apŭng Đức Cơ đĭ đăng văjê̆ 70 tong phao păng tơmam vă pơm phao kŭm hăm 1,2 kơloăi tơmam đôh nai hai.