Dôm tơring kơ dêh char Kon Tum ah kơsơ̆ măng đei ‘mi noh: Đăk Glei, Ngọc Hồi, Tu Mơ Rông, Đăk Tô, Sa Thầy, Đăk Hà, Kon Braih păng pơlei tơm Kon Tum. Ƀok Nguyễn Văn Huy, Kơdră Anih jang Hơlen tơroi hơyuh tŏ ‘mi  Kon Tum ăn tơbăt, đak ‘mi tơ̆ dôm tơring hram hơ-iuch đơ̆ng 5-15mm.

‘Nâu jing ‘măng ‘mi hơdrơ̆k pơyan kăp gĭt tơpă kơlih hăp pơm tơjur ƀiơ̆ ‘năr tŏ pơđang. Hơdrol kơ noh, ah năr 24/3, tơ̆ 2 apŭng Kon Plông păng Đăk Glei adoi đei ‘mi. Mă lei, âu hơdrô̆ jing ‘măng ‘mi hơdrơ̆k pơyan. Chih akŏm đơ̆ng Anih hơlen tơroi hơyuh tŏ ‘mi Kon Tum ăn ƀôh, ‘măng ‘mi hơdrơ̆k pơyan lơ̆m tơring teh kơ dêh char Kon Tum truh klui hloh pơtêng hăm sơnăm hơdrol ki pơhlom 1 khei păng pơyan ‘mi sơnăm 2024 đei sơkơ̆t adoi truh klui hloh.