Lơ̆m 9 khei âu ki, tơdrong jang tŏk đơ̆ng dêh char Kon Tum iŏk đei hloh 7%, lơ hloh kơ sô̆ jang tŏk jô̆ păh lăp kơ lơ̆m teh đak păng lơ hloh lơ̆m tơring Tây Nguyên. Thu mong jên jang teh đak iŏk đei hloh 2.300 ti hlak jên, đei 51% trong tơlĕch jang. Tơlĕch jên  tơmơ̆t jên jang teh đak đei dang 958 ti hlak jên, iŏk đei hloh 41% pơting hăm jên tơlĕch jang đei pơjao.

Vă jang đang đei tơdrong hơgăt hơtŏk tơiung mŭk drăm - tơpôl sơnăm 2024, lơ̆m 3 khei uơ oei dơ̆ng kơ sơnăm dêh char Kon Tum tŏk bŏk dơ̆ng tơ̆ hơnăp lơ tơdrong kơ hret. Mă hơdăh mŭk drăm tŏk kơ dêh char athei iŏk đei đơ̆ng 9,34% tơ̆ kơpal; Thu mong jên jang teh đak lơ̆m tơring athei iŏk đei 2.000 ti hlak jên. Khŭl chĕp kơ̆l pơgơ̆r Đảng bộ dêh char Kon Tum hlôi drơ̆ng nơ̆r trong jang vă akŏm bơ̆jang kiơ̆ lơ̆m dôm khei uơ oei dơ̆ng kơ sơnăm.