Đảng ƀô̆ apŭng sơlam Teh đak Sa Thầy, dêh char Kon Tum đei 53 hơnih đảng tơring hăm vă jê̆ 2.100 đảng viên. Lăp đơ̆ng rŏng Hơnih Đảng dêh char Kon Tum rơih pơgơ̆r hop akŏm blŭng Đảng ƀô̆ kơ apŭng, năr 04/7/2024 Khul kơdră chĕp pơgơ̆r Đảng ƀô̆ apŭng Sa Thầy hlôi pơjing Trong jang kơsô̆ 208 găh hơmet ăn păng pơgơ̆r Hop akŏm Đảng rim hơnih jăl jang 2025-2030. Yă Y Sâm, Kơ iĕng Kơdră chĕp pơgơ̆r Đảng apŭng Sa Thầy tơbăt, apŭng hlôi tơlĕch jang kơtang hơmet ăn hop akom ăn rim kang ƀô̆ tơm dơnơm, adoi pơjing Khul jang hơlen kơdră jang, Hơnih jang pơprŏ hla bơar tơchơ̆t păng Khul jang chĕp pơgơr Hop akŏm:“Vă hơmet ‘lơ̆ng ăn Hop akŏm, Khul kơdră chĕp pơgơ̆r Đảng apŭng hlôi pơrô̆ athei rim hơnih bơ̆ jang hơmet pơ ‘lơ̆ng bơ̆ jang hơlen măt bơngai kơdră vă pôk tơmơ̆t ƀlep trong pơkăp, ƀlep nơ̆r athei jang kiơ̆ 35 păng dôm hla bơar pơtho tơbăt đơ̆ng Khul kơdră Trung ương găh bơ̆ jang hơlen Kơdră vă pôk tơmơ̆t. Hăm dôm tơdrong tơchơ̆t hlôi pơrô̆ athei Hơnih bơ̆ jang vei lăng kon pơlei apŭng păng rim hơnih bơ̆ jang dăr lăng dơ̆ng rim tơdrong Tơchơ̆t Hop akŏm Đảng jăl jang 2020-2025 păng rim tơdrong jang chinh trĭ kơ apŭng”.

Atŭm hăm bơ̆ jang hơmet ăn hop akŏm blŭng Đảng ƀô̆ apŭng, Hơnih Đảng apŭng Sa Thầy pơrô̆ athei rim hơnih đảng tơ iung pơjing trong hơmet ăn pơgơ̆r hop akom kơ chi ƀô̆, đang ƀô̆ ƀlep hăm trong tơlĕch ăn, nơ̆r athei jang kiơ̆ 35 đơ̆ng Hơnih tơm Chinh trĭ.

Kiơ̆ kơ ‘noh, rim chi ƀô̆ găh Hơnih Đảng tơring gô pơgơ̆r keh đang hop akŏm hơdrol năr 30/11/2024. Đảng ƀô̆ tơring Ia Xiêr đei Hơnih Đảng apŭng Sa Thầy rơ̆ih pơgơ̆r hop akŏm blŭng a kơ tơring gô đei pơgơ̆r lơ̆m năr 06/1/2025. Ƀok Phan Chí Thiện, Ƀĭ thư Đảng tơring Ia Xiêr tơbăt, dang ei đĭ đăng 13 chi ƀô̆ lơ̆m tơring hlôi iung jang tĕnh koăng hơmet ăn hop akŏm:   “Đĭ đăng rim chi ƀô̆ đei tơbăt ăn tôch kơ hrôih găh trong jang pơgơ̆r hop akom blŭng a kơ tơring. Rim chi ƀô̆ hlôi pơm tơlĕch dôm tơdrong tơchơ̆t truh dang ei ‘noh đĭ đăng chi ƀô̆ chih tơlĕch tơdrong tơchơ̆t, tŏk bok iŏk nơ̆r tơgop đơ̆ng rim hơnih bơ̆ jang ƀơm truh vă đei dôm tơdrong tơbăt bơ̆ jang chinh trĭ, hla bơar hơlen keh kong păng trŏ lăp hăm yan ou. Blŭng khei 10 đĭ đăng chi ƀô̆ gô pơtruh ăn dôm hla bơar chih hơnăn ăn pôk tơmơ̆t Khul kơdră chĕp pơgơ̆r ăn kơ Khul kơdră chĕp pơgơ̆r Đảng tơring lăng hơlen păng tơgop nơ̆r”.

Atŭm hăm bơ̆ jang ‘lơ̆ng hơmet ăn hop akom jăl ‘nao, rim hơnih đảng tơ̆ apŭng Sa Thầy, dêh char Kon Tum jei tŏk bŏk akŏm atŏk kơtang bơ̆ jang pơting dih băl vă kơkuh chơt hơ iă hop akŏm đảng rim hơnih. Dăr lăng, iung jang kơtang keh đang rim trong tơlĕch jang mă jăl hop akŏm hơdrol tơlĕch ăn. Adoi đơ̆ng tơdrong pơkoel yan ou, sơkơ̆t hơdăh dôm trong jang hơdăh ăn jăl jang truh ou kơnh. ‘Nhŏng A Tơ̆, Ƀĭ thư chi ƀô̆ jang hloi thôn trơng pơlei Plei O, tơring Ia Xiêr, tơbăt:“Lăp đơ̆ng rŏng pơtôch jăl jang 2022-2025, kiơ̆ nơ̆r pơrô̆ athei đơ̆ng Đảng uỷ tơring Ia Xiêr, hơnơ̆ng bơ̆ jang hơmet ăn hop akŏm jăl jang ‘nao 2025-2027, atŭm hăm ‘noh rim kang ƀô̆, đang viên jei hơdrin iung jang chă pơrô̆ pơrôp kon pơlei hơmet pơ ‘lơ̆ng mir pơgar vă iung jang kiơ̆ Tơdrong jang tơm Teh đak atŏk tơ iung mŭk drăm. Vă hơmet ăn hop akŏm jăl jang 2025-2027, chi ƀô̆ jei hlôi pơgơ̆r hop akŏm vă rơih rim bơngai ‘lơ̆ng ăn pôk tơmơ̆t jang kơdră, bơ̆ jang hơmet pơ ‘lơ̆ng hla bơar, truh dang ei hlôi jang keh đang, kiơ̆ hơlen hơdrol lơ̆m năr 16/10/2024 chi ƀô̆ Plei O gô pơgơ̆r Hop akŏm”.

Truh dang ei apŭng Sa Thầy, dêh char Kon Tum hlôi jang keh đang 54 lơ̆m 71 trong tơlĕch jang mă Tơdrong tơchơ̆t Hop akŏm Đảng apŭng ‘măng mă XVII, jăl jang 2020-2025 tơlĕch ăn. Dôm tơdrong jang ‘lơ̆ng ‘noh lơ̆m tơdrong jang tơ iung pơjing Đảng, jô̆ hơtŏ lơ̆m sơnăm apŭng pôk tơmơ̆t đei 100 ‘nu đảng viên ‘nao, lơ hloh 10% trong tơlĕch jang. Đĭ đăng 64 pơlei đei Ƀĭ thư chi ƀô̆ jang hloi Thôn trơng dăh mă Kơdră chĕp pơgơ̆r khul jang măt trân, lơ hlŏh 30% pơtêng hăm Tơdrong tơchơ̆t.

Hrei ou, Khul Kơdră chĕp pơgơ̆r Đảng apŭng Sa THầy tŏk bŏk hơnơ̆ng pơrô̆ athei 53 hơnih Đảng tơring iŏk jang ‘lơ̆ng rim trong bơ̆ jang, ƀlep trong tơlĕch ăn păng jang keh đang tơdrong pơgơ̆r Hop akŏm hơdrol năr 10/2/2025. Atŭm hăm ‘noh pơrô̆ athei khul jang chinh trĭ kơrŭn đĭ ai jang keh đang rim tơdrong jang jăl hơdrol tơlĕch ăn vă pơm hơyak blŭng ăn jăl jang ‘nao iung jang kơtang hloh dơ̆ng, ‘lơ̆ng hơ iă hloh dơ̆ng lơ̆m chĕp pơgơ̆r, iung tơjră, tơ iung pơjing Đảng ƀô̆ păng khul jang chinh trĭ kơ apŭng roi năr roi rơgoh ‘lơ̆ng, pran kơtang, vei lăng năng tông tơdrong hơrih sa kơ kon pơlei roi năr roi phĭ tơtŏ dơnŏ ‘lơ̆ng dơ̆ng kơjăp, hơnuk hơnoa.