Tơ̆ pơlei tơm Kon Tum, Hơnih chĕp pơgơ̆r 35 Dơnŏ anih Đảng dêh char Kon Tum pơgơ̆r Hop akŏm hŏk pơhrăm găh vei lăng năng tông trong jang jơhngơ̆m đon kơ Đảng sơnăm 2023 ăn kơdră chĕp pơgơ̆r, khul joăt jang rim hơnih bơ̆ jang pơchoh trong bơ̆ jang tơgŭm ăn Dơnŏ anih Đảng dêh char, Jơnŭm vei lăng kon pơlei, Hơnih vei lăng kon pơlei, Hơnih bơ̆ jang MTTQ Việt Nam dêh char; rim Hơnih bơ̆ jang chinh trĭ-tơpôl păng khul bơ̆ jang Hơnih chĕp pơgơ̆r, Khul joăt jang, Khul jang Thư kĭ jang tơgŭm ăn Hơnih chĕp pơgơ̆r 35 kơ apŭng păng dêh char Kon Tum.

Đei pơgơ̆r lơ̆m 1 năr 1 poăt păng iŏk đơ̆ng năr 29/5, Hop akŏm hŏk pơhrăm mĭnh ƀar tơdrong bơ̆ jang vei lăng năng tông trong jang jơhngơ̆m đon kơ Đảng sơnăm 2023 kơ yuơ Hơnih Chĕp pơgơ̆r 35 Dơnŏ anih Đảng dêh char Kon Tum pơgơ̆r vă atŏk kơtang jơhngơ̆m đon hlôh vao chinh trĭ, hơnăp jang kơ kang ƀô̆, đảng viên pran kơjăp iăp kơtang, jang kiơ̆ ‘lơ̆ng rim trong bơ̆ jang đơ̆ng Đảng lơ̆m chăl ‘nao; pơjing đei dơ̆ng jơhngơ̆m đon hlôh vao ăn kang ƀô̆ chĕp pơgơ̆r, khul jang tơgŭm tơchă ƀôh, đei trong jang ‘lơ̆ng xek tơlang dôm tơdrong tơblă tơblŭng tơpôl vă jang kiơ̆ rim trong jang hơdăh đei jơnei lơ̆m rim tơdrong jang chinh trĭ tơ̆ tơring, tơ̆ hơnih bơ̆ jang.