Lơ̆m akŏp hơgăt teh xă hloh 56.000 héc ta bri tơ̆ 2 apŭng Sa Thầy păng Ngọc Hồi kơ dêh char Kon Tum, Khŭl vei lăng Pơgar bri ‘long teh đak  Chư Mom Ray băt hơdăh dang 20.000 héc ta, lơ̆m noh đei 250 héc ta bri pơtăm tŏk bŏk đei hơmơt kơ ŭnh sa tôch kơ dêh. Ƀok Đào Xuân Thủy, Kơdră Anih vei lăng Pơgar tơbăt, anih jang tŏk bŏk hơnơ̆ng hơvơn, pơvei tôch ai khŭl jang tang găn ŭnh sa, mă loi ‘noh jĭ tơ̆ dôm tơƀôt bri đei ‘nhĕt, bri hơlam hăm pơ o, pơ le ‘lao păng bri pơtăm.

Khŭl lĭnh vei lăng bri kơtă 72 ‘nu, đei hơmet ăn 14 hơnih jang păng 21 hơnih gak. Hơdai hăm tơroi tơbăt, krao hơvơn, tơtă ăn kon pơlei ‘nĕ kơ yua ŭnh, ‘nĕ kơ soh mir roh lơ̆m ‘năr tŏ vă tang găn tôch ai dôm tơdrong hơmơt kơ ŭnh sa. Anih jang iŏk yua Flycam vă dăr lăng rim năr chă ƀôh hrôih, đơ̆ng hơtăih dôm tơdrong hơmơt vă hơmet pơ ‘lơ̆ng ŭnh sa tơtom.