‘Năr 18/5, tơ̆ plt Kon Tum, Khul kơdră chĕp kơ̆l đảng dêh char Kon Tum pơgơ̆r Hop akŏm pơtôch 2 sơnăm bơ̆ jang kiơ̆ Nơ̆r pơkăp kơsô̆ 01 đơ̆ng Anih tơm Chinh trĭ găh “Hơtŏk tơdrong hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô”, atŭm hăm ‘nŏh pôk pơ ư, hơpăh tơmam ăn dôm khul grŭp, rim bơngai jang rơgei mư̆h hŏk pơhrăm păng jang kiơ̆ Jơhngâm đon ‘lơ̆ng đơ̆ng Ƀok Hô.

Ƀar sơnăm âu ki, dêh char Kon Tum pơjing đei vă jê̆ 1.300 trong jang hơiă, đei yoa mưh hŏk pơhrăm, jang kiơ̆ jơhngâm đon ‘lơ̆ng đơ̆ng Ƀok Hô. Mă loi jĭ trong jang “Jơva teng neng hŏk pơhrăm”, “Hnam hŏk hiôk chơt” đơ̆ng Anih pơtho pơhrăm, “Năr 4 hue lăng tơ̆ tơring” đơ̆ng Đảng ƀô̆ apŭng Đăk Glei, “Bô̆i mong phe ‘mêm mơnat” đơ̆ng Đảng ƀô̆ apŭng Ngọc Hồi”…

Tơdrong hơtŏk hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô vang tơgop pơm hơtŏk đon hlôh vao, jang tơnăp đơ̆ng rim anih jang đảng, anih jang kơ tĕh đak mưh bơ̆ jang tơdrong jang chinh trĭ đei pơjao; tơplih ming đon bơ̆ jang ăn đe kăn ƀô̆, bơngai jang kơ tĕh đak kiơ̆ trong roi đunh jang roi rơgei, đei yoa ‘lơ̆ng.

Tơ̆ Hop akŏm, Khul kơdră chĕp kơ̆l Đảng dêh char Kon Tum athei rim anih jang, tơring tơrang, khul grŭp grŭp lơ̆m dêh char hơnơ̆ng tơplih ‘nao trong jang, hơtŏk tơdrong ‘lơ̆ng mư̆h hŏk pơhrăm păng jang kiơ̆ jơhngâm đon ‘lơ̆ng đơ̆ng Ƀok Hô vă gơ̆h đei đon adrin đơ̆ng kơdih, bơ̆ jang hơnơ̆ng hơnong hăm rim kăn ƀô̆, đảng viên, bơngai jang ăn tĕh đak păng kon pơlei...

Tơ̆ Hop akŏm 21 khul grŭp păng 30 ‘nu bơngai chơt hơiă iŏk đei Kơthơ hôn bơnê đơ̆ng Bí thư đảng dêh char Kon Tum; 19 khul grŭp păng 26 ‘nu bơngai đei Anih vei lăng kon pơlei dêh char Kon Tum hơpăh ăn Ƀăng khen.