Đĭ đăng tĕh đei iŏk pơdreu đei Anih vei lăng kon pơlei dêh char Kon Tum pơjao ăn Anih vei lăng kon pơlei thĭ trơ̆n Đăk Glei, apŭng Đăk Glei vei lăng kiơ̆ tơdrong hơgăt. Công ty jang hơdoi man Hnam kơmăy unh điên VGR Ngọc Linh đei hơnăp jang pơjao dơ̆ng tĕh, tơdăh ưh chu ‘nŏh vă tơlĕch trong pơgŏ kiơ̆ khôi luơ̆t.

Tơdrong pơm ăn Anih vei lăng kon pơlei dêh char Kon Tum iŏk pơdreu dơ̆ng tĕh đơ̆ng Công ty jang hơdoi man Hnam kơmăy unh điên VGR Ngọc Linh thuê, vă man Hnam kơmăy unh điên Đăk Ruồi 2 păng Đăk Ruồi 3 ‘nŏh yoa ƀơm truh lơ tơdrong glăi đơ̆ng Công ty âu, nhen, ưh jăh iŏk yoa tĕh lê̆ hŏh hlŏh 24 khei kiơ̆ tơdrong pơkăp tơmât jên jang; ưh đei pơm hla ar vă pơdui dơ̆ng năr yoa tĕh; man anih pơgơ̆r vei lăng, anih pơm hơdroh ăn tơdrong jang, pơih trong năm tơ̆ anih vă jang… ‘ngoăih kơ tĕh đei pơjao, asong thuê.