Kơ yuơ đei ƀơm đơ̆ng ‘mi pru tơ̆ đak dơsĭ, đơ̆ng pơgê brei (25/9) lơ̆m dêh char Kon Tum hlôi đei ‘mi. Iung tơjră hăm hơmơt đei ‘mi tih lơ̆m dôm năr truh au kơnh, kơdră chĕp pơgơ̆r rim hơnih kơ dêh char Kon Tum hlôi tơlĕch rim trong jang tang găn hơlau ‘mi kial hơbut hơbông păng teh tơdrŭt hơlih. 

Tơ̆ rim apŭng rŏ năng đei ‘mi tih ‘nŏh: Kon Plông, Tu Mrông păng Đăk Glei, Hơnih vei lăng kon pơlei dêh char Kon Tum pơrô̆ athei rim tơring tơlĕch jang tang găn hơlau ‘mi kial hơbut hơbông păng teh tơdrŭt hơlih. Hăm kon pơlei oei tơjê̆ jih thoong đak, tơring thŭng, hơmơt đei đak lip, đak lŏk jroh kơtang, teh tơdrŭt hơlih kơtang ‘nŏh iung jang hloi trong tang găn hơlau, pơgơ̆r yông kon pơlei năm oei tơ̆ hơnih sơđơ̆ng. Ăn khul bơ̆ jang dăr lăng, pơtho tơƀôh trong nơnăm tơ̆ rim hơnih đak lăh, đak lơ̆p kơtang, đak jroh kơtang. Hơmet khul jang, kmăi kmŏk iung jang ming hơmet pơ ‘lơ̆ng tơdăh đei tơdrong au to, pơm sơđơ̆ng trong chă yak hiôk hian lơ̆m jơ ‘năr ‘mi tih.