Đơ̆ng khei 2/2024, dôm hnam trưng pơtho, rong ‘me hŏk tro bơngai kon kông lơ̆m dêh char hlôi athei khŭl joăt pơtho dôm môn hŏk dăr hơlen, pơtôch tơdrong pơtho hŏk hmă păng hơlen lăng dơ̆ng tơdrong hŏk gơh pơm lăp hăm ‘Măng pơlong tốt nghiệp jăl 3 tơ̆ đĭ đăng dôm môn mă hŏk tro chih măt pơlong. Đơ̆ng rŏng kơ ăn hŏk tro chih măt  ƀai pơlong akŏm păng chih măt ‘meh vă set mơ̆t hŏk lơ̆m hnam trưng đăi hŏk lơ̆m blŭng khei 3, pơtơm blŭng đơ̆ng ‘năr 1/4 dôm hnam trưng pơgơ̆r ăn kơ đe oh pơhrăm ming ƀai hŏk pơlong truh đĭ ‘năr 22/6.

Hnam trưng hŏk teh đak rong ‘me hŏk tro hŏk jăl 3 dêh char Kon Tum sơnăm ‘nâu đei 178 ‘nu hŏk tro vang akŏm ‘Măng pơlong tốt nghiệp jăl 3. Đĭ đăng mĕ ƀă hŏk tro tă kơ drơ̆ng lăp hăm tơdrong lê̆ kon oh hơnơ̆ng oei kơtă tơ̆ hnam trưng akŏm pơhrăm ming ƀai hŏk păng hnam trưng hlôi pơgơ̆r pơhrăm ming tôch kơ ‘lơ̆ng. Khŭl kơdră tơring kŭm đei trong tơgŭm trŏ lăp, mă loi ‘noh jĭ hăm dôm oh đei tơdrong arih sa mơmat tat, tơgŭm đe oh sơđơ̆ng lơ̆m kơplăh pơhrăm ming ƀai vă pơlong păng dôm năr vang akŏm ‘măng pơlong Tốt nghiệp jăl 3 lơ̆m hơtuch khei 6 truh.