Tơdrong vă jang Man nak tang găn đak hơbông, teh tơdrŭt rim pơlei kon kông ‘moi kiơ̆ thoong đak kroong Đak Bla lơm pơlei tơm Kon Tum hăm hơtăih truh 4.400m. Tơdrong vă jang ou đei iung jang ming man đơ̆ng khei 9 sơnăm sơ̆ păng sơkơ̆t hơlou truh khei 9 sơnăm ou ‘noh ming man keh đang, mă lei truh dang ei ‘nao lăp ming man keh đang 18% trong tơlech jang đĕch. Akŏp kon jên tơmơ̆t jang ‘noh hloh 200 ti hlak jên, mă lei truh dang ei tơdrong jang ming man keh đang ‘nao lăp tơhloach hloh 60 ti hlak jên. ‘Nou jĭ tơdrong jang kăl hloh kơ dêh char, kơna sơnăm 2023 hlôi đei pơjao ăn tôm kon jên jang đơ̆ng kon jên bơ̆ jang kơ Trung ương; đơ̆ng rŏng ‘noh ăn asong dơ̆ng pơđunh khei ‘năr jang ming man păng tơlĕch kon jên jang truh năr 31/12/2024. Mă lei, tơdrong jang ou tơnap mă ming man keh đang ƀlep jơ ‘năr pơkă kơ yuơ tơhlăk tơhlĭn găh hơgăt teh vă ming man. Atŭm hăm Tơdrong vă jang Man nak tang găn đak hơbông, teh tơdrŭt rim pơlei kon kông ‘moi kiơ̆ thoong đak kroong Đak Bla, lơ hơnih jang ming man tơm tơ̆ dêh char Kon Tum jei gô ưh kơ keh đang ƀlep jơ ‘năr pơkă, ưh kơ gơ̆h vă tơlĕch ăn kon jên teh đak tơmơ̆t jang ƀlep trong pơprŏ jang mơ̆n.