Hơlen lăng găh tơdrong bơ̆jang kiơ̆ hơnăp jang mŭk drăm - tơpôl đơ̆ng Anih jang Đảng dêh char Kon Tum ăn ƀôh sơnăm 2023 lơ tơdrong hơgăt gĭt kăl ưh kơ iŏk đei. Mă hơdăh jang tŏk tơlĕch ăn ‘noh hloh 10% mă lei lăp iŏk đei 7,32%; thu mong jên jang teh đak tơlĕch ăn 4.500 ti hlak jên mă lei bơ̆jang kiơ̆ đei 4.200 ti hlak jên; tơlĕch jên jang tơmơ̆t jên jang teh đak lăp đei vă jê̆ 44% pơting hăm jên tơring pơjao păng hơdai hăm ‘noh jĭ lơ tơdrong mơmat tat, ưh kơ ‘lơ̆ng oei đei.

Tơ̆ hop akŏm ‘măng mă 14, Khŭl chĕp kơ̆l pơgơ̆r Đảng bộ dêh char Kon Tum jăl XVI hlôi akŏm pơma dơnuh, pơm hơdăh tơdrong tơm pơm ăn, hơnăp jang đơ̆ng rim anih jang, rim tơring hăm dôm tơdrong ưh kơ ‘lơ̆ng, hơdai hăm tơlĕch ăn tơdrong hơgăt păng trong jang hơmet ming pơ ‘lơ̆ng lơ̆m sơnăm 2024.