Vă hơmet ăn tơdrong năm chă kơting linh lôch tang teh đak pơyan phang sơnăm ‘nâu, Anih chĕp kơ̆l pơgơ̆r khul linh dêh char Kon Tum pơtho ăn Khul K53 dăr hơlen, chih hơdăh 43 tơdrong tơroi găh pơsat linh lôch tang teh đak tơ̆ teh đak boăl. Kiơ̆ đơ̆ng chă hơlen năng, đei lơ nơ̆r tơroi tôch kơ trŏ, rŏ năng gô sir chă đei kơting linh lôch tang ăn teh đak.

Pơma tơ̆ jơ pơm lêh năm jang, yă Y Ngọc, Phŏ Kơdră vei lăng kon pơlei dêh char Kon Tum athei Anih chĕp kơ̆l pơgơ̆r khul linh dêh char Kon Tum hơtŏk tơdrong chĕp kơ̆l pơgơ̆r, pơtho tơƀôh ăn Khul K53 lơ̆m khei ‘năr bơ̆ jang; jang ‘lơ̆ng tơdrong pơtho tơƀôh chinh trĭ, đon tơchĕng ăn đe kăn ƀô̆, linh; hơtŏk tơdrong mât 1 ƀơ̆r đon, jang mă tơnăp, jang kiơ̆ ‘lơ̆ng ki luơ̆t linh păng dôm trong jang, tơdrong tơgŭm đơ̆ng Đảng, khôi luơ̆t kơ 3 teh đak Việt Nam-Lào-Campuchia. Đei băt pơyan phang sơnăm sơ̆, Khul K53 dêh char Kon Tum sir chă, chơ brŏk tơ̆ teh đak đei 16 kơ̆l linh lôch tang ăn teh đak tơ̆ Lào păng Campuchia.