Xăh Đăk Nhoong, apŭng Đăk Glei, dêh char Kon Tum đei trong sơlam apŭng plĕnh teh kơjung hloh 35km tơtil hăm apŭng Đăk Chưng, dêh char Sê Kông, teh đak buăl Lào. Hăm jơhngơ̆m đon “Mĭnh ‘nu kon pơlei ‘noh jĭ 1 jrăng sơlam hơrih”, sơnăm âu ki Kơđông lĭnh vei lăng tơring sơlam Đăk Nhoong jang hơdai kơjăp hăm Khŭl kơdră xăh Đăk Nhoong bơ̆jang kiơ̆ ‘lơ̆ng tơdrong tơchơ̆t 01 đơ̆ng Thủ tướng teh đak găh pơgơ̆r tơdrong jang đĭ đăng kon pơlei vang vei lăng tơdrong pơm tơm hơgăt teh, sơđơ̆ng tơring sơlam teh đak lơ̆m tơdrong ‘nao.

Đại tá Phạm Cảnh Toàn, Phŏ Chính uỷ ƀô̆ đô̆i tơring sơlam dêh char Kon Tum tơbăt, Đăk Nhoong jĭ xăh mă blŭng lơ̆m akŏp kơ sô̆ 13 xăh sơlam kơ dêh char Kon Tum pơgơ̆r năr akŏm. ‘Nâu jĭ tơdrong jang ‘lơ̆ng chĭnh trĭ, ‘mêm mơnat gĭt kăl, jĭ ‘măng vă kang ƀô̆, khŭl lĭnh sơlam băt bơnê truh kơdră đảng, kơdră tơring păng kon pơlei.