Lơ̆m ƀai pơre ƀât jơ pơdong, ƀŭ 12 kơ̆l linh lôch tang tĕh đak, yă Y Ngọc, Phŏ Kơdră vei lăng kon pơlei dêh char, Kơdră Anih pơgơ̆r jang 515 dêh char Kon Tum ƀrơ̆k jơhngâm pơma: Tơ̆ hơnăp pơhngol đei linh lôch tang ăn tĕh đak, dơ̆ng tang ăn Đảng ƀô̆, khul kơdră pơgơ̆r, khul linh păng kon pơlei dôm hơdrĕch hơdrung dêh char Kon Tum apinh tơƀôh jơhngâm đon kŭp yom, ‘mêm hơmanh, sơmanh bơnê tôch ai hăm đe linh lôch tang ăn tĕh đak- dôm bơngai kon hơ ‘lơ̆p gơ̆h hơgei kơ hơdrĕch hơdrung Việt Nam, dôm bơngai ‘măn đĭ jơhnơr mơlôh ‘lơ̆ng hơiă đơ̆ng kơdih, chu lôch tang nuih mơng yoa tơdrong rơngei kơ hơdrĕch hơdrung păng jơhngâm tơguăt hăm apŭng plenh tĕh tôch ‘lơ̆ng. Truh dang ei, đĭ đăng 12 kơ̆l linh lôch tang ăn tĕh đak đei sir akŏm chơ vih ‘măng mă âu tam mă băt hơnăn ngăl.