Hăm pơkăp “Tơguăt tơguăl, gơh hơgei, adrin keh đang tơnăp dôm xơnong jang păng tơchơ̆t tơplih 'nao; Hơmet hơtŏk pơ-'lơ̆ng pơtho pơhrăm”, xơnăm hŏk 2022- 2023 anih jang Pơtho Pơhrăm dêh char Kon Tum hlôi đei jơnei hloh kơ dôm tơchơ̆t kăp gĭt. Atŭm hăm tơrĕk hơtŏk pơtho pơhrăm, xơnăm hŏk âu anih jang hơtŏk pơ-'lơ̆ng hơgei, tơplih 'nao găh tơdrong hơlen băt, rơih iŏk pơtho hŏk tro hơgei, hŏk tro hơbĕch. Băt hơdăh tơdrong adrin đơ̆ng bơngai pơtho păng đe hŏk tro, Anih tơm Pơtho Pơhrăm, Anih jang vei lăng kon pơlei dêh char Kon Tum pôk Ƀăng Bơnê, Anih Pơtho Pơhrăm dêh char Kon Tum pôk Hla bar Bơnê ăn 54 bơngai pơtho păng 219 hŏk tro gơh hơgei xơnăm hŏk 2022- 2023.