‘Năr 16/3/1975, đĭ đăng khul linh dêh char Kon Tum kŭm hăm Sư đoàn 968 tơblăh tơdrŭt, tơgăr iŏk lơ tơring khul linh, anih jang chinh trĭ gĭt kăl kơ hơyăt, tơblăh rơngei đĭ đăng thĭ xăh Kon Tum păng tơring găh Tu Tây Nguyên. Tơ̆ lêh tơbăt, ƀok Lê Ngọc Tuấn, Phó Bí thư Đảng dêh char, Kơdră vei lăng kon pơlei dêh char Kon Tum pơma hơdăh: Tơblăh iŏk rơngei Kon Tum jĭ tơdỏng tôch gĭt kăl đơ̆ng Đảng ƀô̆, khul linh păng kon pơlei dôm hơdrĕch hơdrung lơ̆m dêh char, vang tơgop kăp gĭt ăn tơdrong tơblăh hrĕnh đơ̆ng Tơdrong iung tơblăh tih pơyan Puik mak 1975 iŏk rơngei đơ̆ng đăng tơring pơbăh, pơjing đei 1 teh đak kơjăp ‘lơ̆ng.

Chĕp vei kơjăp tơdrong juăt kơ tang nuih mơng, đơ̆ng rŏng 50 sơnăm tơblăh iŏk rơngei, Đảng ƀô̆, khul linh păng kon pơlei dôm hơdrĕch hơdrung dêh char Kon Tum yak hlŏh kơbăt dôm yơ tơdrong pơmat tat, pơlong nol vă pơjing pơlei pơla roi đunh roi tŏk pơdrŏng, ‘lơ̆ng rŏ. Lơ sơnăm hơnơ̆ng, dêh char Kon Tum vei kơjăp tơdrong jang tŏk mŭk drăm tôch pran. Truh dang ei kơsô̆ unh hnam tơnuh jur pă 4,31%; tơdrong arih xa găh tơmam drăm păng jơhngâm đon kơ kon pơlei roi tŏk, um ai tơring tơrang păng tơring kơdrâm hơnơ̆ng tơplih ‘lơ̆ng.