Iung pơma tơ̆ pơm lêh tơbăt, ƀok Lê Ngọc Tuấn, Kơ dră chĕp pơgơ̆r Hơnih vei lăng kon pơlei dêh char Kon Tum ‘meh vă tơpôl hơnih mơdro sa, bơngai mơdro sa hơnơ̆ng tơgop lơ̆m atŏk tơ iung kơ dêh char. Dêh char pơkăp pơjing rơvơn ‘lơ̆ng hơ iă hloh ăn khul hơnih mơdro sa tơmơ̆t jên jang, atŏk tơ iung. Tơ̆ Pơm lêh tơbăt 20 sơnăm Năr bơngai mơdro sa Việt Nam năr 13/10 păng pơgơ̆r pơma dơnuh hăm hơnih mơdro sa ‘măng mă 2 sơnăm 2024, jang kiơ̆ tơdrong jang pơting dih băl “Vang xut hŭt hnam pơgia, hnam hnăt hnot” kơ yuơ dêh char Kon Tum tơlĕch jang, 13 hơnih mơdro sa păng Khul bơngai mơdro sa sơnăm mơlôh dêh char Kon Tum tơgŭm vă jê̆ 400 triu hlak jên. Jơ ‘năr ou, Hơnih vei lăng kon pơlei dêh char Kon Tum pôk ăn Hla bơar hôn bơnê ăn 27 hơnih mơdro sa, bơngai mơdro sa jang ‘lơ̆ng, 23 ‘nu bơngai jang ‘lơ̆ng găh Khul bơngai mơdro sa sơnăm mơlôh dêh char Kon Tum đei sơng iŏk Hla bơar Pôk bơnê đơ̆ng Hơnih chĕp pơgơ̆r Trung ương Khul bơngai mơdro sa sơnăm mơlôh Việt Nam.