Tơ̆ jơ bơ̆jang, kơdră chĕp kơ̆l dêh char Kon Tum kŭm hăm dôm anih jang kơpal hlôi chih iŏk lơ tơdrong roi tơbăt ƀơm truh mơmat tat, tơhlăk tơhlĭn kăl kơ hơmet pơ ‘lơ̆ng đơ̆ng tơ ‘ngla hloh 10 anih mơdro sa, đei lơ lơ̆m tơdrong jang tơmơ̆t jên jang ming man hnam kơmăy đak ŭnh điên păng iŏk jang tơmam drăm lơ̆m teh.

Ƀok Nguyễn Ngọc Sâm, Phŏ Kơdră Anih vei lăng kon pơlei dêh char Kon Tum hlôi tơl tơblang hloi hăm rim tơdrong, tơhlăk tơhlĭn hơdăh. Hăm dôm tơdrong apĭnh tam mă gơh hơmet pơ ‘lơ̆ng kơtă anih, Phŏ Kơdră Anih vei lăng kon pơlei dêh char Kon Tum Nguyễn Ngọc Sâm pơjao kơ dôm anih jang kŭm hăm 1,2 apŭng, pơlei tơm akŏm tơgŭm anih mơdro sa găh trong jang, hla ar vă hơmet pơ ‘lơ̆ng mơmat tat, tơhlăk tơhlĭn păng đei khei ‘năr pơkăp hơdăh tơl tơblang ăn anih mơdro sa.