Đơ̆ng rŏng lơ trong jang hlôi tơlĕch jang kiơ̆ vă tang găn hơmơt kơ tơhiong tơmam păng hiong jên jang đơ̆ng tơdrong jang kôch iŏk chuơh, hơga lơ̆m đak krong, ‘nao âu Anih vei lăng kon pơlei dêh char Kon Tum đei hla ar athei, anih jang kơpal, khŭl kơdră rim tơring lơ̆m dêh char hơtŏk loi dơ̆ng vei lăng gre chơ đei tăh kơ kơmăy kơmŏk, tơmam hrip chuơh, hơga.

Vă găn hơmơt kơ hiong jên jang đơ̆ng tơdrong jang kôch iŏk, tĕch mơdro chuơh, hơga lơ̆m đak krong, Anih vei lăng kon pơlei dêh char Kon Tum kŭm athei Anih jang Thuê̆ dêh char hơtŏk loi dơ̆ng tơdrong jang dăr hơlen, hơlen lăng tơdrong pơm kiơ̆ khôi luơ̆t găh thuê̆, hla ar hoă đơn păng tơdrong chih tơroi, bơ̆jang kiơ̆ hơnăp jang thuê̆ hăm jên jang teh đak đơ̆ng khŭl jang, rim bơngai đei bơ̆jang kôch iŏk tơmam chuơh, hơga; sek phak tơpăt dôm bơngai pơm glăi khôi luơ̆t găh thuê̆, jên nôp păng hla ar hoă đơn kiơ̆ ƀlep hơgăt đơ̆ng khôi luơ̆t; tơtom chă ƀôh, sek phak tơ păt dôm anih jang roi tơbăt, chih tơroi ưh kơ tơpăt.