Tơ̆ jơ tơƀơ̆p muh măt, hloh 120 ‘nu bơngai jang lơ̆m Khŭl chih hla ar kơ tơroi dêh char Kon Tum păng dôm bơngai tang măt hlôi vang pơ đŏu dơ̆ng tơdrong joăt joe ang hơdăh 98 sơnăm hla ar chih kơtơ̆ng ang kach mang Việt Nam pơjing păng hơtŏk tơiung. Pơma tơ̆ jơ tơƀơ̆p muh măt, ƀok Nguyễn Văn Hòa, Phŏ Bí thư Anih jang Đảng dêh char Kon Tum pơma hơdăh hơnăp jang gĭt kăl đơ̆ng hla ar chih kơ tơ̆ng ang lơ̆m chih tơ roi kơtơ̆ng ang, pơm tơdrong drơ̆ng lăp lơ̆m tơpôl, hơmet ming đon lui đơ̆ng rim răih Kon pơlei lơ̆m tơdrong chĕp kơ̆l đơ̆ng Đảng, vei lăng đơ̆ng teh đak tơgop bơ̆jang kiơ̆ jơnei tơdrong hơgăt, hơnăp jang hơtŏk tơiung mŭk drăm - tơpôl kơ dêh char.

Pơlong hla ar chih kơtơ̆ng ang dêh char  Kon Tum ‘măng mă XI hlôi iŏk đei 60 ƀai chih. Jơnŭm châm ƀai pơ tôch tăh kơ phiê̆u châm điêm rơih 27 ƀai chih hơgei hloh vă hơ păh tơmam. ‘Măng âu, Khŭl chih hla ar tơroi dêh char  Kon Tum kŭm hlôi pơ jao asong mê đai Yua kơ tơdrong jang Chih kơ tơ̆ng ang Việt Nam đơ̆ng Khŭl chih hla ar tơroi Việt Nam ăn 2 ‘nu jang lơ̆m khŭl.