Chih jô̆ đơ̆ng Anih jang Đoàn dêh char  Kon Tum ăn ƀôh lơ̆m năr pơlong blŭng a, dôm khŭl jang tơgŭm pơyan pơlong tơ̆ 12 hơnih pơlong tốt nghiệp jăl 3 kơ dêh char hlôi tơgŭm hŏk tro hloh 1.500 ‘măng gre chơ đĕch; asong 7.000 get chai đak; hloh 300 kơ hôp đak toh; kơ hrĕng tŏ ‘long chih, tơmam sut…. ăn hŏk tro.

Hơdai hăm ‘noh dôm khŭl năm jang tơgŭm tơ̆ dôm hơnih pơlong lơ̆m dêh char kŭm hlôi tơtom tơgŭm hŏk tro hơmet ‘lơ̆ng 1, 2 tơdrong đei ƀôh, nhen tep hiơt, hiơt hla ar pơ long tơ̆ hnam. Hơdai hăm tơdrong jang năm tơgŭm đei yua ăn hŏk tro pơlong tốt nghiệp jăl 3 tơ̆ dôm hơnih pơ long, kơ hrĕng ‘nu hŏk tro tơ̆ dêh char Kon Tum kŭm đei khŭl kơdră, khŭl hơdruh tơdăm păng hnam trưng tơgŭm hơnih sŏng sa, oei đĕch lơ̆m dôm năr pơgơ̆r pơlong.