Pơgơ̆r lơ̆m 2 năr, ‘năr 20 păng 21/9, Hop akŏm bơngai tang măt Khul kon pơlei jang chŭn mir dêh char Kon Tum ‘măng mă IX, jăl jang 2023- 2028 hlôi chih hơdăh lơ tơdrong tơm, trong jang gĭt kăl lơ̆m tơdrong jang đơ̆ng Khul păng tơdrong choh jang xa lơ̆m 5 sơnăm truh. Hop akŏm bơngai tang măt Khul kon pơlei jang chŭn mir dêh char Kon Tum ‘măng mă IX đei 277 ‘nu bơngai tang măt dơ̆ng tang ăn hlŏh 65.000 ‘nu bơngai jang lơ̆m dêh char.

Jăl jang đơ̆ng 2023- 2028 hop akŏm chih hơdăh lơ tơdrong jang tơm gĭt kăl, khŏm pơjing Khul kon pơlei jang chŭn mir tơ̆ jơ̆p tơring lơ̆m dêh char pran kơjăp tôm tơdrong; Roi tơbăt, krao hơvơn kon pơlei tưk tơiung tơdrong choh jang xa, pơjing tơring tơrang ‘nao; Vei lăng tơdrong đei yoa trŏ luơ̆t ăn kon pơlei jang chŭn mir; Hơtŏk tơdrong jang "Kon pơlei pơjei băl choh jang xa, tĕch mơdro rơgei, mât mĭnh ƀơ̆r đon tơgŭm băl jang pơm pơdrŏng păng tơjur tơnuh hin kơjăp ‘lơ̆ng" hơdai hăm tơdrong krao hơvơn “Pơm tơplih ming đon tơchĕng, trong jang đơ̆ng kon pơlei kon kông, pơm ăn kon pơlei kon kông đei đon adrin jang tŏk klăih đơ̆ng tơnuh hin kơjăp ‘lơ̆ng”, tơgop pơjing dêh char Kon Tum jang tŏk hrĕnh păng kơjăp. Hop akŏm bơngai tang măt Khul kon pơlei jang chŭn mir Kon Tum ‘măng mă IX, jăl jang 2023- 2028 pôk rơih đei Khul kơdră chĕp kơ̆l ‘nao đei 32 ‘nu. Ƀok Nguyễn Quang Thủy đei pôk pơm Kơdră vei lăng Khul kon pơlei jang chŭn mir dêh char Kon Tum.