Kơyuơ đơ̆ng ‘mi kial kơsô̆ 6, đơ̆ng kơsơ̆ năr 26/10, lơ̆m dêh char Kon Tum đei ‘mi pah ai, ‘mi tih tơ̆ lơ tơring, lơ̆m noh apŭng Đăk Glei đei ‘mi tih hloh hăm đak ‘mi hram đơ̆ng 80-120mm. Oei dôm apŭng Ia H’Drai, Kon Plông, Đăk Tô, Kon Braih, Ngọc Hồi, Sa Thầy păng pơlei tơm Kon Tum ‘noh đak ‘mi hram đơ̆ng 50-81mm.

Tơlĕch tơdrong jang tơjră hăm ‘mi kial kơsô̆ 6, Anih jang vei lăng kon pơlei dêh char Kon Tum pơgơ̆r 10 apŭng, pơlei tơm, mă kăl noh 3 apŭng gah hơlĕch, Hơlĕch Tu kơ dêh char noh Đăk Glei, Tu Mơ Rông păng Kon Plông pơm jang trŏ tơchơ̆t đơ̆ng Jơnŭm pơgơ̆r teh đak, Anih tơm jang tơ̆ Trung ương păng đơ̆ng dêh char gah hơtŏk trong jang vă tang găn păng tơjră hăm ‘mi kial đak hơbông pơrăm. Pơtoi chă hơlen kơjăp trong kial tơhlu, tơlĕch jang kiơ̆ “4 tơdrong tơ̆ tơring”, kơchăng tơjră păng hơmet dôm tơdrong răm, tơlĕch chơ chă tơgŭm dŏng dôm tơdrong đei ƀôh; tơlĕch trong vei sơđơ̆ng gah kon pơlei, mŭk tơmam kon pơlei, vei sơđơ̆ng tơpôl tơ̆ tơring păng anih ‘nhăk kon pơlei oei akŏm.