Vă tơroi tơbăt, tơroi axong – kăl pơm jang; pơm trong hiôk vă bơngai jang, đe đoan viên hơdruh tơdăm gơh băt tôm, tơtom găh tơdrong jang, đơ̆ng noh rơih đei tơdrong jang trŏ ƀlep, năr 17/5, tơ̆ pơlei tơm Kon Tum, Anih axong jang – Linh jĭ rơka păng Tơpôl jang hadoi hăm Anih jang đoan dêh char Kon Tum pơgơ̆r.

Tơ̆ Năr tơdrong jang dêh char Kon Tum xơnăm 2023 đei 37 anih jang mŭk drăm chih măt kăl iŏk bơngai jang hăm hloh 3.200 tơdrong jang lơ̆m dêh char, 'nguaih kơ dêh char păng năm jang kiơ̆ pơkăp khei năr tơ̆ teh đak đe. 12 anih jang vang akŏm iŏk bơngai jang kơtă ăh Năr tơdrong jang adoi đei tơdrong jang jơnei kơjăp, tơchơ̆t kla jên khei păng tơdrong pơyua nai tơnăp ăn bơngai jang.

Lơ̆m Năr tơdrong jang dêh char Kon Tum xơnăm 2023, dôm anih jang mŭk drăm kăl iŏk bơngai jang hlôi xơng, tơroi tơdrong jang ăn pơhlom 700 bơngai jang, sinh viên păng đoan viên hơdruh tơdăm. Dêh char Kon Tum đei jơnei tơchơ̆t lơ̆m xơnăm 2023 axong tơdrong jang ăn hloh 6.000 bơngai jang, lơ̆m noh đei 100 bơngai năm jang tơ̆ teh đak đe.