‘Nâu jĭ nơ̆r pơma hơdăh đơ̆ng Khŭl chĕp kơ̆l pơgơ̆r Anih jang dêh char Kon Tum tơ̆ Hop akŏm hơlen lăng hloh 3 sơnăm jang kiơ̆ Tơchơ̆t kơsô̆ 1 đơ̆ng Anih tơm Chĭnh trĭ găh hơnơ̆ng tŭn pran hŏk pơhrăm păng pơm kiơ̆ jơhngơ̆m đon ‘lơ̆ng Ƀok Hồ pơgơ̆r pơgê brei (14/5), tơ̆ pơlei tơm Kon Tum. Pêng sơnăm âu ki, hloh 84.000 ‘nu kang ƀô̆, đảng viên dêh char Kon Tum hlôi hŏk pơhrăm, vei kơjăp tơdrong Tơchơ̆t kơsô̆ 01 păng tơdrong jang hŏk pơhrăm, pơm kiơ̆ jơhngơ̆m đon ‘lơ̆ng Ƀok Hồ kơ dêh char.

Ƀok Lê Quang Thới, Phŏ Kơdră Khŭl chĕp kơ̆l Ban Tuyên giáo Anih jang Đảng dêh char Kon Tum, tơbăt, dêh char hlôi pơjing Tơdrong jang “Hŏk pơhrăm păng pơm kiơ̆ jơhngơ̆m đon ‘lơ̆ng Ƀok Hồ găh jang tơnăp, đĭ jơhngơ̆m, tơgop pơjing Kon Tum hơtŏk tơiung hrĕnh păng kơjăp ‘lơ̆ng”.