Vă 'măng pơlong gơh xơđơ̆ng, tơnăp, trŏ nhen tơchơ̆t, truh khei năr âu Jơnŭm pơgơ̆r Pơlong tôt ngĭp THPT dêh char Kon Tum xơnăm 2023 hlôi tơlĕch dôm tơdrong hơlen hơmet tơ̆ 12 anih pơlong, anih in tơlĕch đê pơlong; pơih lăm pơhrăm găh tơdrong jang hơlen pơlong tôt ngĭp THPT ăn kang ƀô̆, bơngai pơtho kơ dôm hnam trưng pơtoi pơgơ̆r tơnăp tơdrong pơhrăm ăn đe hŏk tro năm pơlong, mă hăt noh tơ̆ dôm hnam trưng đei lơ hŏk tro kon kông. 'Măng pơlong tôt ngĭp THPT xơnăm âu dêh char Kon Tum đei 5.024 'nu pơlong, tŏk 273 'nu pơlong pơtêng hăm sơnăm xơ̆. Lơ̆m noh, hloh 4.800 'nu pơlong hŏk THPT păng hloh 160 'nu pơlong găh hŏk yăo yŭk thương xwên. Kơsô̆ hŏk tro kon kông pơlong noh đei hloh 1.700 'nu, bơngai pơlong kơdih chih măt jê̆ 220 'nu. Dêh char Kon Tum hlôi pơjing đei 12 anih pơlong, lơ̆m noh đei 5 anih pơlong tơ̆ pơlei tơm Kon Tum, 7 anih pơlong tơ̆ dôm apŭng păng bơngai lăng pơlong tơ̆ dôm anih pơlong noh hloh 900 'nu.