Ƀlep ƀơ̆t tơbăt 98 sơnăm năr Hla ar kơtơ̆ng ang Kach mang Việt Nam (21/6/1925 - 21/6/2023), pơgê (20/6), Kŏng an dêh char Dak Lak pơgơ̆r tơƀơ̆p muh măt bơngai tang măt dôm anih jang kơtơ̆ng ang bơ̆jang lơ̆m tơring. Tơ̆ âu, kơdră chĕp kơ̆l Kŏng an Dak Lak tơbăt hlôi rôp vei 74 ‘nu lơ̆m ‘măng tơdrŭt lơ̆m anih bơ̆jang vei lăng kon pơlei 2 xăh tơ̆ apŭng Cư Kuin âu ki. 

Tơ̆ jơ tơƀơ̆p muh măt, Thiếu tướng Lê Vinh Quy - Kơdră chĕp kơ̆l Kŏng an dêh char Dak Lak, roi tơbăt, đơ̆ng rŏng tơdrong grŭp bơngai kơ nê̆ tơdrŭt lơ̆m anih bơ̆jang vei lăng kon pơlei 2 xăh Ea Tiêu păng Ea Ktur găh apŭng Cư Kuin gơmăng 11/6, pơm ăn 2 ‘nu kang ƀô̆ xăh, 4 ‘nu kŏng an xăh lôch păng 2 ‘nu kŏng an rơka, 3 ‘nu kon pơlei lôch; truh dang ei anih jang kơpal hlôi rôp vei 74 ‘nu ƀơm truh. Dang ei tơdrong jang dăr hơlen, chă druh rôp oei tŏk bŏk pơgơ̆r hăt hot. Kŏng an dêh char kŭm tŏk bŏk hơdrin jang hơdai hăm khŭl linh kơpal vei sơđơ̆ng tơring, tŭn pran tơroi tơbăt truh rim răih kon pơlei sơđơ̆ng jơhngơ̆m đon, sơđơ̆ng jang sa.