Sơnăm 2023, tơpôl tơ̆ dêh char Gia Lai đei vei sơđơ̆ng ‘lơ̆ng. Kiơ̆ kơ noh, Kŏng an dêh char Gia Lai hlôi pơih đei 4 ‘măng tơlĕch tơdrŭt tơdrong pơm glăi; hơlen băt 863 ‘măng glăi, hăm hloh 1.400 bơngai pơm yoch; rôp vei 855 ‘nu, iŏk akŏm 6,3 tih hlj pơdreo ăn bơngai ƀơm răm. Anih jang Kanh sat hơlen dôm jăl chă hơlen, sơkơ̆t tơkêng 1.100 ‘măng glăi, hăm hloh 2000 ‘nu pơm yoch; ƀôh băt tơkêng 17 ‘măng glăi hăm 30 bơngai xa pơjĭp, iŏk akŏm hloh 3,7 tih hlj.

Vang truh hop akŏm, ƀok Trương Hải Long – Phŏ Ƀĭ thư Tĭnh uy, Kơdră Anih jang vei lăng kon pơlei dêh char Gia Lai pơkăl, sơnăm  2024 Kŏng an dêh char Gia Lai pơtoi tơgŭm jang đei jơnei ăn Anih jang vei lăng kon pơlei dêh char gah tơdrong vei sơđơ̆ng tơpôl, sơđơ̆ng chĭn trĭ; tơjră tơnăp hăm dôm tơdrong pơm glăi, mă kăl noh lơ̆m ‘măng Têt Nguyên đan Giáp Thìn 2024.