Lơ̆m kơthơ, dêh char Đăk Lăk ră hơdăh: Kon pơlei rim hơdrung hơdrĕch kơ dêh char tôch blĕk hăm tơdrong pơm glăi khôi luơ̆t đơ̆ng khul bơngai pơm kơnê̆. Khul juăt jang kơpal tenh kuăng chă ƀa trui rôp dôm bơngai oei lăi vă xek tơlang kơjăp kiơ̆ tơchơ̆t đơ̆ng khôi luơ̆t teh đak. Rim jăl jang kơpal, jơnŭm pơgơ̆r tơring hlôi tơlĕch lơ trong jang vă xơđơ̆ng tơpôl, tơtom năm apong hơlêm, tơgŭm hăm dôm unh hnam đei bơngai lôch hơchăng, rơka hơbur; tơroi, hơvơn kon pơlei hơdral, nĕ chă pơngơ̆t kiơ, pơm kiơ̆ tơdrong pơtho đơ̆ng anih jang kơdră kơpal. Tĭnh wi, Hô̆i đŏng kon pơlei, Anih jang vei lăng kon pơlei, Anih jang Măt trâ̆n tôh kuôk Việt Nam dêh char tơhlâu kơtang hăm tơdrong tơdrŭt anih jang kơpal kơ teh đak, pơlôch bơngai, pơm yoch glăi khôi luơ̆t đơ̆ng khul bơngai khenh kơnê̆; atŭm hăm noh, pơtruh nơ̆r vang ol xơ 'ngon hăm dôm tơdrong hiong răm jĭ đon bơnôh hăm unh hnam đe linh kŏng ang, kang ƀô̆ păng kon pơlei. Dêh char Đăk Lăk hơvơn kon pơlei, đe linh lơ̆m tơring teh kơ dêh char tơguăt minh bơnôh, lui ngeh hăm trong tơchơ̆t jang đơ̆ng Đảng, tơdrong pơgơ̆r đơ̆ng dôm jăl kơdră kơpal tơ̆ tơring. Vang jang tơnăp lơ̆m tơdrong jang “Tôm kon pơlei vei lăng xơđơ̆ng teh đak”, chĕp vei jơhngơ̆m pran kơ tơdrong tơguăt tơguăl hăm kon pơlei vei xơđơ̆ng kơjăp; jang hadoi, tơgŭm ăn khul kơdră kơpal jang xơnong jang tơm; atŭm jơhngơ̆m tơgŭm, vang glơng tơdrong hiong răm jĭ bơnôh hăm dôm unh hnam đe linh kŏng ang, kang ƀô̆ păng kon pơlei ƀơm đe kơnê̆ tơdrŭt; xơđơ̆ng pơm jang, tơgop vei xơđơ̆ng hơtŏk tơ-iung kơ tơring. Ưh đei chih tơbang dôm kơtơ̆ng ang đei tơrĕk lơ̆m mạng tơpôl ƀơ̆t tam mă đei hơlen hơdăh, pơrăm truh tơdrong jang đơ̆ng khul linh păng đe kơdră kơpal, păng tơdrong pơm hiơ̆r đon bơnôh hăm kon pơlei; athei kơchăng mă tơnăp “ưh mơ̆ng, ưh lui, ưh kiơ̆” đe pơm kơnê̆ blơ̆ blĕch, ayăt iŏk tơdrong đei tơ̆ tơring vă chă hơlĕnh pơdăr, tơdui iung tơjră jơnŭm pơgơ̆r tơring, pơm tơxŭl tơxăl tơpôl lơ̆m tơring teh.