Lơ̆m tơ iung pơjing tơring tơring ‘nao, Kră pơlei Puih Duch (tơring Ia Dêr, apung Ia Grai, dêh char Gia Lai) atŭm hăm kang ƀô̆ tơring, pơlei hơdrin chă pơtho khan, pơrô̆ pơrôp  kon pơlei pơm trong, ơng pơtăm ‘long pơm dur pơgar hnam, atŏk kơtang pơting dih băl jang sa, mơdro sa hơgei, pơtrŭt pơm pơdrŏng trŏ lăp. Hăm dôm trong jang hơdăh, tơ̆ pơlei Jut 2, ƀok đei kon pơlei yom kơtang păng jang kiơ̆.

Ƀok Ksor Du, kon pơlei oei lơ̆m pơlei Jut 2 tơroi: Sơnăm 2017, ƀok Puih Duch tơroi ăn kon pơlei akhan pơlei hlôi đei Teh đak tơgŭm ăn 1 ti 300 triu hlak jên vă pơm trong kơjung hơtăih 1km 300 met. Ƀok hlôi chă hơvơn lơ ŭnh hnam lơ̆m pơlei plang teh vă pơm trong, vang tơ iung pơjing pơlei pơla ‘nao, kơdih ƀok hlôi plang teh ŭnh hnam vă pơm trong. Gơnơm lăp đon păng hơdrin đơ̆ng kang ƀô̆ păng kon pơlei, truh dang ei, pơlei hlôi đei trong ‘nao ‘lơ̆ng liĕm. Trong man hlôi tơgŭm ăn kon pơlei chă yak hiôk hian, tơdrong chă chơ tơmam drăm păng tĕch mơdro tơmam drăm kơ kon pơlei hlôi ƀônh ƀŏ hloh. Pơlei Jút 2 ư̆h khan lăp jang keh đang rim tơdrong pơkăp tơ iung pơjing tơring tơrang ‘nao mă lei oei đei rơ̆ih jing pơlei ‘lơ̆ng liĕm tơ iung pơjing tơring tơrang ‘nao vă rim pơlei anai lơ̆m tơring năm lăng, hŏk pơhrăm pơm kiơ̆. Ƀok Ksor Du, pơma:“Băng: “Tơroi găh tơdrong pơm jŭk yŭk trong hơlau đơ̆ng ƀok kră pơlei Puih Duch, kon pơlei bu bu jei hôn bơnê, yom kiơ̆. Ƀok ‘noh jĭ bơngai ling lang tơjê̆ hăm kon pơlei, chă pơrô̆ pơrôp, pơtho khan ăn kon pơlei hơdrin jang sa vă tơdrong erih sa sơđơ̆ng păng atŏk tơ iung pơlei pơla roi năr roi ‘lơ̆ng liĕm, kon pơlei tơ̆ au bu bu jei mơ̆ng kiơ̆ kră pơlei păng ling lang erih sa ‘moi kiơ̆ trong jang ‘lơ̆ng đơ̆ng ƀok”.

Kră pơlei Puih Duch hlôi đei bơ̆ jang kơchư̆k gĭt kăl lơ̆m tơring nhen: Kơdră chĕp pơgơ̆r Hơnih vei lăng kon pơlei tơring Ia Dêr; Kơdră chĕp pơgơ̆r Kŏng ang tơring; Bí thư Chi bộ păng dang ei ‘noh Kơdră Hơnih bơ̆ jang măt trân, jĭ bơngai đei kon pơlei kơ pơlei Jut 2 yom. Jĭ mĭnh ‘nu đảng viên, ƀok Puih Duch ling lang tơƀôh hơdăh jĭ “gơng tơroh”, hơnhăk trong bơ̆ jang đơ̆ng Đảng păng Teh đak truh hăm kon pơlei. Ƀok Puih Duch pơma:“Ba jing gơng tơroh kloh klĕch, kon pơlei oei lui kiơ̆ ‘noh ba oei jang dơ̆ng. Dôm trong bơ̆ jang đơ̆ng Đảng păng Teh đak ‘nŏh ba jei tĕnh koăng chă tơroi tơbăt truh ăn kon pơlei vă pơm lơ liơ tơdrong erih sa roi năr roi ‘lơ̆ng rŏ, phĭ tơtŏ hơnŏ ‘lơ̆ng dơ̆ng kơjăp, pơlei roi năr roi tơplih ‘nao. Hloh dơ̆ng, kon pơlei ưh kơ gơ̆h chă mơ̆ng kiơ̆, lui kiơ̆ khul kơnê̆ chă pơhlŭ pơdôr pơm tơdrong pơm pơrăm tơdrong tơgoăt tơgoăl pôm nơ̆r ƀơ̆r đon, atŭm hăm ‘nŏh rim hnam kăl ăn kon hơ ‘lơ̆p năm hŏk pơhrăm tôm vă kơbăt chư, đơ̆ng nŏh tơ iung pơjing pơlei pơla, teh đak pơdrŏng ‘lơ̆ng liĕm”

Ƀok Siu Hnit, Kơ iĕng Kơdră chĕp pơgơ̆r Hơnih vei lăng kon pơlei tơring Ia Der, tơbăt: Găh tơdrong tơnăp, phăl hơlăng, ƀok Puih Duch ling lang pơm jŭk yŭk trong hơlau lơ̆m rim tơdrong jang kơ pơlei, iung jang hơdoi hăm khul jang chinh trĭ tơring, chă pơrô̆ pơrôp, hơvơn kon pơlei jang kiơ̆ ‘lơ̆ng rim trong bơ̆ jang đơ̆ng Đảng păng Teh đak. Lơ̆m au, ‘lơ̆ng hloh ‘noh lơ̆m bơ̆ jang chă pơrô̆ pơrôp, pơtho khan rim tơdrong jang: “hơrih sa ‘lơ̆ng lui kơjăp”; tơ iung pơjing tơring tơrang ‘nao; hŭt tơdrong iŏk ŭnh om tim tôm sơnăm, iŏk hơgăm; atŏk tơ iung mŭk drăm ŭnh hnam,…“Đảng viên Puih Duch pơlei Jut 2 ‘noh bơngai đei kon pơlei yom kơtang, ling lang chă pơrô̆ pơrôp, pơtho tơbăt rim trong bơ̆ jang đơ̆ng Đảng păng teh đak. Rim ‘măng hop akŏm, ƀok jei chă chih răk tôm tong păng mưh brŏk tơ̆ pơlei ‘nŏh tơroi tơbăt ăn kon pơlei hloi dôm tơdrong jang găh muk drăm, hŏk pơhrăm, vei lăng sơđơ̆ng, tơgop gĭt kăl lơ̆m tơgŭm ăn tơring jang keh đang rim tơdrong pơkăp găh tơring tơrang ‘nao. Ƀok ‘noh bơngai ‘lơ̆ng, phăl hơlăng đei kon pơlei yom kơtang”.

Ia Grai ‘noh apŭng sơlam teh đak, đei 13 tơring, thĭ trân hăm 150 pơlei, koeng kơphô̆, lơ̆m au đei 92 pơlei kon kông. Dôm sơnăm au ki, rim kră pơlei, thôn trơng păng dôm bơngai đei kon pơlei yom hlôi tơgop kơtang lơ̆m xek tơlang rim tơdrong jang mŭk drăm-tơpôl, tơ iung pơjing erih sa ‘lơ̆ng, sơđơ̆ng dơ̆ng kơjăp pơlei pơla, vei kơjăp păng atŏk tơ iung tơdrong oei sa joăt joe sơ̆ ki ‘lơ̆ng rŏ kơ hơdrĕch hơdrung, pơm kiơ̆ kơjăp tơgoăt tơgoăl pôm nơ̆r ƀơ̆r đon rim hơdrech hơdrung. Ƀok Trương Thế Vinh, Kơdră chĕp pơgơ̆r Hơnih bơ̆ jang vei lăng Kon kông apŭng Ia Grai, tơbăt: “ Ƀok Puih Duch ‘noh jĭ bơngai ‘lơ̆ng kơ kang ƀô̆ măt trân, ƀok ling lang jang keh đang tơdrong jang đei pơjao, mă kăl ƀok hlôi jang ‘lơ̆ng hơnăp jang pơm gơng tơroh kloh klĕch vă pơrô̆ pơrôp kon pơlei vang iung jang kiơ̆ Tơdrong jang tơm Teh đak atŏk tơ iung mŭk drăm-tơpôl lơ̆m tơring kon kông, lơ̆m au đei tơdrong jang kiơ̆ trong jang pơm tơjur măt bơngai iŏk ŭnh om hrôih, iŏk hơgăm lơ̆m tơring kon kông, mă kăl ‘noh bơ̆ jang vei lăng năng tông kon kông. Lơ̆m bơ̆ jang nhôn jei băt hơdăh hơnăp jang păng tơdrong jang tơnăp đơ̆ng ƀok hăm kon pơlei lơ̆m tơring”

Hăm dôm tơdrong tơgop đơ̆ng kơdih, ƀok Puih Duch hlôi sơng iŏk đei lơ hla bơar pôk bơnê, hla bơar hôn bơnê đơ̆ng Trung ương truh tơ̆ tơring pôk ăn. Tơjê̆ au hloh, khei 9/2022, ƀok đei Kơdră chĕp pơgơ̆r Hơnih vei lăng kon pơlei dêh char Gia Lai pôk ăn hla bơar pôk bơnê kơ yuơ hlôi bơ̆ jang ‘lơ̆ng lơ̆m tơdrong akŏm tơ iung pơjing tơgoăt tơgoăl hơdrĕch hơdrung tơ̆ tơring pơlei.