Duch pơtho Đào Thị Huyền, pơtho tơ̆ trưng jăl kơ đeh Ea Trul, xah Ea Trul, apŭng Krông Bông hloh 24 sơnăm tơguăt hăm tơdrong jang pơtho pơhrăm, duch ăn tơbăt, pơm jang tơ̆ tơring tơnap tap, 75% hŏk tro ‘noh kon hơ-ioh kon kông noh sơnăm hŏk mă yơ adoi thoi ăi, hơnơ̆ng ah blŭng sơnăm đe thâi, duch pơtho kơ hnam trưng năm chih akŏm hơnăn truh rim hnam chă hơvơn hŏk tro năm hŏk tơ̆ lăm: “Lơ̆m tơdrong hŏk pơhrăm, đe oh hơnơ̆ng kơ pơdơh hŏk kơlih tơdrong hơrih unh hnam tơnap tap, mĕ ƀă năm jang tơ̆ ataih ưh đei bơngai vei lăng noh phơ phŏ pơdơh kơ hŏk, ‘noh bơngai pơtho pơgơ̆r lăm athei năm truh tơ̆ hnam hơvơn đe oh năm hŏk hăm tơdrong hơpơi vă đe oh băt kơ chư. Lơ̆m tơdrong jang pơtho pơhrăm, inh hơnơ̆ng năm truh tơ̆ hnam hơvơn đe oh năm hŏk, noh đe oh adoi năm truh tơ̆ lăm păng hŏk pơhrăm tơnăp hloh”

Ƀok Nguyễn Văn Tiến, Kơdră hnam trưng jăl kơđeh Ea Trul, xah Ea Trul, apŭng Krông Bông ăn tơbăt, sơnăm hŏk âu, hnam trưng đei jê̆ 650 hŏk tro. Hnam trưng hơdrin đei 100% hŏk tro năm hŏk tơ̆ lăm. Vă đei jơnei tơlĕch jang, ‘nguaih kơ tơdrong pơgơ̆r jang, pơgơ̆r hŏk hôp bơngai pơtho pơgơ̆r lăm, asong jang hadoi hăm jơnŭm pơgơ̆r tơring, jơnŭm jang tơpôl hơvơn đe hŏk tro năm truh lăm hŏk, hnam trưng oei hăt hot hơvơn dôm anih jang ‘mêm bơnat chă tơgŭm đe hŏk tro đei tơdrong hơrih tơnap tap, vă đe oh sơđơ̆ng hloh hŏk pơhrăm. Ƀok Nguyễn Văn Tiến tơroi: “Hnam trưng tơguăt hăm jơnŭm pơgơ̆r tơring, dôm anih jang ‘mêm bơnat tơgŭm ăn 50 kơsâ̆p săch yăo khua lăm 4, 500 blah hơbăn ao. Hăm Anih jang Pơtho Pơhrăm păng Kŏng ti săch tơmam drăm hŏk pơhrăm Đăk Lăk tơgŭm ăn 10 hŏk tro lăm 1 đei 10 kơsâ̆p săch. Atŭm hăm noh, hnam trưng hlôi jang hadoi hăm mĕ ƀă hŏk tro răt 500 hla bar păng ‘long chih vă hơmet ăn đe mon đơ̆ng blŭng sơnăm mưh đe oh tam mă đei hla bar, ‘long chih vă hŏk pơhrăm lơ̆m sơnăm hŏk 2023-2024”

Kiơ̆ kơ ƀok Huỳnh Viết Trung, Kơdră Anih Pơtho Pơhrăm apŭng Krông Bông, truh dang ei mă lơ hnam trưng hlôi kơchăng ăn sơnăm hŏk ‘nao. Anih pơtho hŏk, khul bơngai pơtho đei vei mah mai, asong tôm bơngai jang ăn pơtho hŏk phôh thŏng ‘nao. Hŏk tro dôm jăl lơ̆m tơring truh tơ̆ lăm hŏk tôm tong. Mă lei, vă đe oh năm hŏk sơđơ̆ng, Anih Pơtho Pơhrăm apŭng hlôi pơtruh hla bar pơgơ̆r rim hnam trưng hŏk jang hadoi hăm dôm jăl pơgơ̆r tơ̆ tơring atŭm chă hơvơn tơroi ăn mĕ ƀă hŏk tro băt, pơm trong hiôk ăn đe oh năm hŏk tơ̆ lăm. Ƀok Huỳnh Viết Trung ăn tơbăt: “Hơvơn hŏk tro năm hŏk tơ̆ lăm tơ̆ dôm tơring tơnap tap noh sơđơ̆ng, oei minh ƀar ‘nu noh nhôn hlôi jang atŭm hăm jơnŭm pơgơ̆r tơring, rim hnam trưng tơgŭm pơgơ̆r jang. Kiơ̆ tơlĕch jang noh năr 15/8 pơtôch ‘măng iŏk bơngai hŏk, mă thoi noh nhôn adoi pơdui khei năr păng truh ăh năr 5/9 dôm hŏk tro yơ tam mă truh tơ̆ lăm hŏk nhôn pơtoi năm hơvơn đe oh năm hŏk vă vei sơđơ̆ng ăn đe oh truh hŏk tôm tơ̆ hnam trưng”

Hăm dôm tơdrong hơdrin đơ̆ng anih jang pơtho pơhrăm apŭng Krông Bông, dêh char Đăk Lăk lơ̆m tơdrong hơvơn hŏk tro năm hŏk đơ̆ng dôm năr blŭng sơnăm hŏk gô jing gru kơnăl hơ-iă ăn minh sơnăm hŏk ‘nao đei jơnei tơnăp.