Hơnơ̆ng iung bơ̆ jang tơ̆ ‘Măng hop akŏm mă 5, Kuô̆k hô̆i ‘măn mĭnh năr lơ̆m năr 29/5 vă dăr lăng găh tơdrong chă hơvơn, vei lăng păng iŏk yua rim khul jang, kon jên jang tơgŭm ăn tang găn jĭ hơbuh Covid-19; tơdrong jang kiơ̆ trong bơ̆ jang, khôi luơ̆t găh hơnih jang pơgang tơring, jang pơgang tang găn hơlau jĭ jăn.

Đŏk tơbăt hơdăh tơ̆ hơnăp Kuô̆k hô̆i, Kơdră chĕp pơgơ̆r Hơnih bơ̆ jang vei lăng Tơpôl kơ Kuô̆k hô̆i, Kơ iĕng kơdră Khul dăr lăng kơ Kuô̆k hô̆i Nguyễn Thúy Anh tơbăt, truh khei 4/2023, Khul jang dăr lăng hlôi sơng iŏk đei rim hla bơar tơbăt bơ̆ jang hăm 15.659 hlak hla bơar chih tơbăt bơ̆ jang. Khul bơ̆ jang dăr lăng tơbăt, găh bơ̆ jang jên hu tang găn jĭ hơbuh, Khul kơdră Teh đak chih jô̆ akŏp kon jên ăn bơ̆ jang tang găn hơlau tơdrong jĭ păng jang kiơ̆ trong jang vei lăng năng tông tơdrong erih sa tơpôl lơ̆m jăl jang 2020-2022 dang 230.000 ti hlak jên, lơ̆m au chă hơvơn đơ̆ng kon jên bơ̆ jang teh đak hloh 186.000 ti hlak jên, pă dôm yơ chă hơvơn đơ̆ng anai. Đei ƀơm truh tơdrong răt kit khăm hơlen kơ Kŏng ty Việt Á, Khul dăr lăng tơbăt, truh blŭng khei 5, kiơ̆ tơbăt đơ̆ng Hơnih tơm Kŏng ang, rim hơnih bơ̆ jang dăr lăng hlôi tơkêng 30 tơdrong pơm glăi hăm đei 107 ‘nu bơngai pơm glăi.