Tŏng thư kĭ Kuôk hô̆i, Kơdră Anih jang kơ Kuôk hô̆i Bùi Văn Cường tơroi gah tơdrong jang vă hơmet akŏm. Kiơ̆ kơ noh, Kuôk hô̆i gô akŏm lơ̆m 2 năr minh puơ̆t vă apinh păng tơl nơ̆r apinh. Kuôk hô̆i gô hơlen tơdrong pơm jang kơ dôm anih jang hăm 10 tơchơ̆t lơ̆m jăl jang 14 păng jăl 15 gah hơlen tơdrong apinh. Pơma ah jơ bơ̆ jang,  Thủ tướng teh đak bơ̆n Phạm Minh Chính bơnê kơ tơdrong hơmet ăn 'măng akŏm apinh păng tơl nơ̆r apinh tơ̆ 'Măng hop akŏm mă 6, Kuôk hô̆i jăl 15. Kiơ̆ đơ̆ng pơma đam ah jơ bơ̆ jang âu, tơgŭm chă trong apinh tơnăp hloh, đơ̆ng noh tơgop hơtŏk đei jơnei lơ̆m tơdrong jang păng đon lui kơ Kuôk hô̆i.

Kơdră Kuôk hô̆i Vương Đình Huệ ăn tơbăt, gah pơkăp gô pơgơ̆r apinh păng tơl nơ̆r apinh kiơ̆ 4 grŭp tơdrong jang: Mŭk drăm akŏm dơnơm; mŭk drăm juăt jang; joh ayŏ, tơpôl; tư phap, tơdrong jang nô̆i chĭnh, hơlen sơkơ̆t kơ teh đak. Rim tơdrong jang akŏm apinh pơhlom đơ̆ng 160 truh  170 pơnĭt, mă lei ah pơgơ̆r apinh noh gô hơmet kiơ̆ kơ tơdrong đei ƀôh.