Nhen kơtơ̆ng ang hlôi tơroi, ‘Măng hop akŏm hăt hot ‘măng mă 5 Kuô̆k hô̆i jăl XV hlôi pơgơ̆r blŭng a pơgê năr 15/1. Mĭnh lơ̆m 4 tơdrong kăl đei pơma dơnuh tơ̆ hop akŏm au ‘noh Tơdrong vă pơjing Tơdrong tơchơ̆t găh mĭnh ƀar trong jang vă hơmet pơ ‘lơ̆ng tơnap tap, tơhlăk tơhlĭn,  atŏk kơtang jang kiơ̆ tĕnh koăng Tơdrong jang tơm teh đak.

Jang kiơ̆ Tơdrong tơchơ̆t găh dăr lăng tơ̆ ‘Măng hop akŏm mă 6, Khul kơdră chĕp pơgơ̆r teh đak pơtruh ăn Kuô̆k hô̆i lăng hơlen, kĭ tơchơ̆t jang kiơ̆ mĭnh ƀar trong jang kăl vă hơmet pơ ‘lơ̆ng tơnap tap, tơhlăk tơhlĭn, atŏk kơtang jang kiơ̆ păng jơnei jang kiơ̆ 3 Tơdrong jang tơm Teh đak, akŏm lơ̆m rim tơdrong kăl: tơdrong klăh asong, pơjao tơdra hơdrol tơlĕch kon kon jên jang Trung ương rim sơnăm; tơdrong hơmet ming tơdrong jang jên hu bơ̆ jang Teh đak, trong pơprŏ kon jên tơmơ̆t jang rim sơnăm; tơdrong iŏk yua kon jên jang Teh đak lơ̆m pơjao tơngla tơdrong vă jang atŏk tơ iung choh jang sa kơdih răt tơmam drăm tơgŭm ăn atŏk tơ iung jang sa; tơdrong tơchơ̆t trong jang pơjao gơ̆h jang ăn apŭng tơchơ̆t hơnăn tơdrong jang, trong jang, klăh asong kon jên jang teh đak lơ̆m tơlĕch jang kiơ̆ rim Tơdrong jang…