Kiơ̆ pơprŏ hơdrol, Kuô̆k hô̆i gô pơdrơ̆ng kiơ̆ Khôi luơ̆t Groi teh (hơmet ming) tơ̆ ‘măng hop akŏm au. Mă lei, truh jơ ‘năr au, trong vă pơjing Khôi luơ̆t Groi teh (hơmet ming) oei đei lơ nơ̆r tơgop phara dih băl, măkăl tơdrong tơchơ̆t iŏk tơvih teh kơ yuơ đei iŏk yua ăn teh đak, tơpôl; găh tơdrong tĕch răt teh choh jang sa, mă kăl chŭn na; găh tơdrong pơm tơ-‘ngla teh kơ bơngai Việt Nam oei tơ̆ teh đak đe; găh mă trong sơkơ̆t hơdăh kơjă ….

Jei lơ̆m pơgê năr 3/11, rim kơdră tang măt tơgop nơ̆r găh pơprŏ jang, trong vă jang iŏk yua teh; Găh jang kiơ̆ trong vă jang pơm hnam oei mơdro sa, trong vă jang ming man hnam oei păng tĕch mơdro tơmam drăm; Găh atŏk tơ iung, iŏk yua păng vei lăng hơgăt teh; Găh ƀơk ăn hla bơar pơm tơ-‘ngla ăn ŭnh hnam, rim bơngai tŏk bŏk đei teh mă lei tim mă đei hla bơar teh, ưh kơ pơm glăi khôi luơ̆t găh teh, ưh kơ lơm pơjao teh glăi ... Lơ kơdră tang măt pơma hơdăh, ‘nau jĭ trong vă pơjing khôi luơ̆t tôch gĭt jăl, athei kăl hơlen mă brĕ mưh lăng hơlen, pơdrơ̆ng kiơ̆. Tơdrong pơdrơ̆ng kiơ̆ trong vă pơjing Khôi luơ̆t au kăl ‘moi kiơ̆ sơđơ̆ng ‘lơ̆ng trong vă pơjing khôi luơ̆t, trŏ lăp hăm tơdrong yan au.