Hăm găh lơ kơdră tang măt drơ̆ng nơ̆r, Kuô̆k hô̆i hlôi pơdrơ̆ng kiơ̆ Khôi luơ̆t Trong nơnăm păng Khôi luơ̆t sơđơ̆ng tơring, sơđơ̆ng trong nơnăm.

Tơ̆ hơnăp dôm nơ̆r tơgop oei phara dih băl găh chăl 2, Apăng 9, tơchơ̆t găh yuh kôl kơ bơngai vơ̆r gre, Kuôk hô̆ hlôi pơgơ̆r pơdrơ̆ng kiơ̆ hơdrô̆ găh tơdrong ‘nou. Pơtôch pơdrơ̆ng, găh lơ kơdră tang măt Kuô̆k hô̆i drơ̆ng nơ̆r hăm tơchơ̆t: Bơngai bu hlôi đei et tơdrô hơlăk ‘noh ưh kơ gơ̆h vơ̆r gre. Đơ̆ng ƀôh yan ou khei năr ou ki, đei lơ hơ ioh hơchăng hŭt lơ̆m gre chơ ba hŏk tro năm hŏk, pơm ăn đei tơdrong ơ̆h sơ-‘ngon, Hơnih chĕp pơgơ̆r Kuô̆k hô̆i hlôi athei Kuô̆k hô̆i tơmơ̆t dơ̆ng mĭnh tơdrong tơchơ̆t ‘nao lơ̆m Khôi luơ̆t Sơđơ̆ng tơpôl, sơđơ̆ng trong nơnăm ‘noh gre chơ hŏk tro, hơ ioh mâm non dăh mă gre chơ tơmam drăm atŭm hăm chơ ba hŏk tro, hơ ioh mâm non kăl đei kmăi kmŏk hrip iŏk nơ̆r, kmăi phĭn rup đe hŏk tro, hơ ioh mâm non păng kmăi kmŏk tơbăt ăn tơdăh đei đe hơ ioh tim mă jur lĕch đơ̆ng gre.